Хүнс, хөдөө аж ахуй, хөнгөн үйлдвэрийн сайд Ж.Энхбаяр албаны хүмүүсийн хамтаар өнгөрсөн амралтын өдрүүдэд Сэлэнгэ аймагт ажиллаж, “Атар-4” тариалангийн тогтвортой хөгжлийн аяны хүрээнд хэрэгжүүлж байгаа тариалангийн талбайн хөрс хамгаалал, хөрсний үржил шимийг сайжруулах ажлуудтай газар дээр нь танилцлаа.

Сэлэнгэ аймаг “Атар IV” аян, “Хүнсний хангамж, аюулгүй байдал”, “Шинэ хөдөө” төслийн хүрээнд энэ жил нийт 7425 га талбайг хашаажуулж, төмс, хүнсний ногооны механикжсан зоорийн багтаамжийг 2000 тонноор нэмэгдүүлэх зорилт тавьжээ. Сайд Орхон сумын Шийрийн бригадын эрт ургацын төмсний хураалт, 12 км талбайд хийсэн хамгаалалтын агро ойн зурвас, хашаажуулалтын ажлын явцтай танилцсан байна.

Тэрээр мөн аймгийн брэнд болсон эрт ургацын ногооны гарц, улаан буудайн болцын хэмжилтүүдийг талбай дээр нь үзэж, тулгамдсан асуудлуудыг сонсон заримыг нь газар дээр нь шийдвэрлэв. Зарим суманд гантай, хуурайшилт ихтэй байгаа ч тариаланчид болон компаниуд худаг, усалгааны системийн тусламжтайгаар ургац алдахгүйн төлөө ажиллаж байгаа талаар салбарын сайдад мэдээллээ.

Эх сурвалж: ХХААХҮЯ