НҮБ-ын Хүүхдийн Сан болон Монгол дахь Их Британийн Элчин сайдын яам Орхон аймагт “Ногоон ирээдүй” уур амьсгалын өөрчлөлтөд тэсвэртэй бага насны хүүхдийн хөгжлийн төв байгуулах хамтын ажиллагааны гэрээнд гарын үсэг зурлаа. Энэхүү төв нь Баян-Өндөр сумын Эрдэнэ багт байрлах нийтийн зориулалттай барилгыг нүүрсгүй, эрчим хүчний хэмнэлттэй, хүүхдэд ээлтэй орчин болгон шинэчлэх юм.

Төсөл хэрэгжсэнээр тав хүртэлх насны 500 гаруй хүүхдэд эрүүл мэнд, хоол тэжээл, хөгжлийн сургалт болон эцэг эхийн оролцоог дэмжих үйлчилгээг үзүүлнэ. Уг санаачилгыг Их Британи, Умард Ирландын Нэгдсэн Хаант Улсын Гадаад харилцаа, хамтын нөхөрлөл, хөгжлийн газар болон Орхон аймгийн хамтарсан хөрөнгө оруулалтаар хэрэгжүүлэх юм.

Гарын үсэг зурах ёслолд Монгол дахь НҮБ-ын Хүүхдийн Сангийн Суурин төлөөлөгч Эваристе Коуасси-Комлан “Энэхүү хамтын ажиллагаа нь Монголын хувьд хамгийн чухал хоёр чиглэл болох уур амьсгалын өөрчлөлтийн эсрэг арга хэмжээ болон бага насны хүүхдийн хөгжлийг нэгтгэж байна. Нүүрс түлэхийг халж, сэргээгдэх эрчим хүч ашигласнаар бид хүүхдийн эрүүл мэндийг хамгаалахын зэрэгцээ ирээдүйг нь ногоон болгож байна” гэв.

Монгол Улсад суугаа Их Британи Улсын Элчин сайд Фиона Блайт “Бид орон нутгийн хөгжлийг дэмжсэн энэ санаачилгад талархаж байна. Цаашид ч байгаль орчныг хамгаалах, хүүхдийн хөгжлийг дэмжих, хүүхэд бүр эрүүл, аюулгүй орчинд өөрийгөө бүрэн хөгжүүлэх боломжтой ирээдүйг бүтээхийн төлөө хамтын ажиллагаагаа үргэлжлүүлнэ” гэж онцоллоо.

Төслийн хүрээнд төвийн дулаан алдагдлыг бууруулж, нарны эрчим хүчээр ажиллах халаалтын систем, дотоод агаар сэлгэлтийн шийдэл, ногоон байгууламж бүхий гадна талбайг байгуулна. Мөн эцэг эх, асран хамгаалагчдад хүүхэд хүмүүжил, хоол тэжээл, эрүүл мэнд, ногоон амьдралын хэв маягийн талаар сургалт зохион байгуулна.

Санаачилга нь Монголын Бага насны хүүхдийн хөгжлийн үндэсний хөтөлбөр болон Парисын хэлэлцээрийн зорилттой уялдаж, сэргээгдэх эрчим хүчийг орон нутгийн дэд бүтцэд нэвтрүүлэх боломжийг харуулах жишиг төсөл болно. Ирэх таван жилийн хугацаанд уг загварыг улс даяар түгээж, нийтийн зориулалттай барилгуудад нүүрс хэрэглэхийг зогсоох зорилготой.

Төсөл энэ оны наймдугаар сард эхэлж, 2026 оны гуравдугаар сард дуусахаар төлөвлөгдөж байна.

Эх сурвалж: UNICEF.org, Gov.uk