Ерөнхий сайд Г.Занданшатар энэ сарын 11-нд 2026 оны улсын төсвийн боловсруулалт болон иргэдээс ирүүлсэн саналын явцыг холбогдох яамдын сайд нараас сонслоо. E-Mongolia болон Засгийн газрын 11-11 дугаарын утсаар явуулсан санал асуулгад 154 мянга гаруй иргэн оролцож, боловсрол, эрүүл мэнд, цахилгаан дулааны асуудлыг хамгийн ихээр онцолжээ.

Санал асуулгаар иргэдийн олонх нь татварын хувь хэмжээг бууруулах, хөрөнгө оруулалтыг хэмнэх, төсвийг эрүүл мэнд, боловсрол, эрчим хүчний салбарт чиглүүлэх шаардлагатай гэж үзсэн байна. Харин нийгмийн халамж, соёл, спорт, аялал жуулчлал, зам барилга зэрэг салбарын зардлыг хэмнэх саналыг дийлэнх нь дэмжжээ.

Сангийн сайд Б.Жавхлан 2026 оны төсвийн төслийн боловсруулалт 80 хувьтай яваа бөгөөд 1232 төслийн саналд нийт 11.3 их наяд төгрөгийн хөрөнгө оруулалт шаардлагатай байгаа ч хянан үзэж 9.6 тэрбум төгрөгт багтаан эрэмбэлэхээр ажиллаж буйг танилцууллаа. Ерөнхий сайд төсвийн ил тод хэлэлцүүлэг нь авлигын индексийг бууруулах, хөрөнгө оруулалтыг зөв хуваарилах ач холбогдолтойг тэмдэглэж, ялангуяа боловсрол, эрүүл мэндийн салбарын төсвийн шинэчлэлийн бодлогыг яаралтай боловсруулах үүргийг өглөө.

Эх сурвалж: ЗГХМОНХГ