Монгол Улс, Бутаны Хаант Улсын Гадаад харилцааны яам хоорондын анхдугаар зөвлөлдөх уулзалт өчигдөр Улаанбаатар хотноо боллоо. Уулзалтыг Монголын талаас ГХЯ-ны Төрийн нарийн бичгийн дарга Л.Мөнхтүшиг, Бутаны талаас Гадаад хэрэг, худалдааны яамны Төрийн нарийн бичгийн дарга хатагтай Пема Чоден нар тэргүүлэв. Л.Мөнхтүшиг хоёр улс далайд гарцгүй, хөгжиж буй орны хувьд хөгжлийн туршлага, сайн жишээгээ хуваалцаж, эдийн засаг, хөдөө аж ахуй, боловсрол, эрүүл мэнд зэрэг олон салбарт хамтын ажиллагаагаа өргөжүүлэх боломжтойг онцоллоо.
Пема Чоден өнгөрсөн онд Бутаны Хаан Жигмэ Гэсэр Намжил Ванчук Монголд хийсэн төрийн айлчлал нь хоёр орны харилцааг бэхжүүлсэн түүхэн ач холбогдолтой үйл явдал болсон гэдгийг дурдав. Мөн төрийн тэргүүн нарын тохирсон санаачилгыг бодит ажил хэрэг болгох хүрээнд хамтран ажиллах өргөн боломж байгаа талаар тэмдэглэлээ.
Талууд энэхүү уулзалт нь Монгол, Бутаны найрсаг харилцааг шинэ түвшинд гаргах чухал алхам болсныг онцолж, цаашид Гадаад харилцааны яам хоорондын зөвлөлдөх уулзалтыг тогтмол зохион байгуулахаар тохиролцов.
Эх сурвалж: ГХЯ
