Туркменистан улсын Аваза хотноо болж буй Далайд гарцгүй хөгжиж буй орнуудын (ДГХБО) асуудлаарх Нэгдсэн Үндэстний Байгууллагын Гуравдугаар бага хурлын хүрээнд Монгол Улсын Гадаад харилцааны яам, НҮБ-д суугаа Байнгын төлөөлөгчийн газар, мөн Цөлжилттэй тэмцэх тухай НҮБ-ын Конвенцын Талуудын 17 дугаар бага хурлын (COP17) бэлтгэл ажлын алба хамтран “Газар, ус, худалдааны гарц шийдэл дэх санхүүжилтийн боломжийг нээх нь” сэдэвт тусгай арга хэмжээг зохион байгууллаа.

Уг арга хэмжээ нь далайд гарцгүй хөгжиж буй орнуудын эдийн засгийн тогтвортой байдлыг хангахад чиглэсэн шинэлэг санаачилгыг хэлэлцэж, бодлогын түвшний хамтын ажиллагааг бэхжүүлэх, олон улсын түншлэл, дэмжлэгийг өргөжүүлэхэд онцгой ач холбогдолтой боллоо.

Монгол Улсын төлөөлөгчдийн тэргүүн, Шадар сайд Н.Учрал арга хэмжээнд хэлсэн үгэндээ, 2026 онд Монгол Улсад зохион байгуулагдах COP17 бага хурлын хүрээнд улс орнуудын хамтын ажиллагааг эрчимжүүлэх, тогтвортой хөгжлийг хангах, байгалийн нөөцийн зохистой менежментийг чухалчилж байгаагаа онцолсон юм. Тэрээр хөрс, усны зохистой менежмент нь зөвхөн байгаль хамгааллын асуудал биш, харин дэд бүтцийн үр ашиг, худалдааны боломжийг өргөжүүлэх гол тулгуур болохыг тэмдэглэв.

Арга хэмжээнд Армени, Туркменистан улсын төлөөлөгчид, НҮБ-ын холбогдох байгууллагууд, түнш орнууд оролцож, уур амьсгалын өөрчлөлтөд дасан зохицох, хөрсний доройтлыг бууруулах, худалдааны бодлого, хөгжлийн санхүүжилт хоорондын уялдааг хэрхэн бий болгох талаар санал солилцжээ.

Энэхүү олон улсын арга хэмжээ нь зөвхөн нэг удаагийн уулзалт бус, ДГХБО-уудын тогтвортой хөгжлийн зорилтыг биелүүлэхэд чиглэсэн цогц шийдэл, санхүүгийн механизмын үндэс суурийг тавих алхам болж байна.

Эх сурвалж: Гадаад харилцааны яам