Wall Street Journal хэвлэлийн мэдээлснээр, сүүлийн жилүүдэд эмэгтэйчүүдийн бугуйн цагны зах зээлд шинэ эргэлт гарч, жижиг загварын, гоёл чимэглэлийн шинжтэй "коктейлийн цагууд" дахин трэнд болж байна. Өмнө нь эмэгтэйчүүд сүрлэг том цаг зүүх нь хүчирхэг байдлын илэрхийлэл хэмээн ойлгогддог байсан бол одоо илүү зөөлөн, эмэгтэйлэг хэв маяг давамгайлах болжээ.

Энэ хандлагыг Bulova, Cartier, Michael Kors зэрэг брэндүүдийн дэгжин, жижиг загварууд илтгэж байгаа бол Rolex Daytona зэрэг эрэгтэй төрлийн том цагнуудаас миллениал эмэгтэйчүүд татгалзаж эхэлсэн байна. Тухайлбал, супермоделиуд өмнө нь өргөн цар хүрээтэй том цаг зүүх нь өөрийн дуу хоолойг илэрхийлэх, гоо зүйн шинэ стандарт тогтоох тэмцлийн нэг хэлбэр гэж үздэг байсан. Харин өнөөдөр тэд уламжлалт жижиг хэлбэрт эргэн шилжиж байна.

Судлаачид цар тахал, хөл хорионы дараах нөхцөл байдлыг энэхүү гоёлын жижиг цагт дахин татагдах нэг шалтгаан гэж тайлбарлаж байна. Гэртээ удаан хугацаанд "даруухан" байсан эмэгтэйчүүд өөрийгөө илэрхийлэх шинэлэг, анхаарал татах зүйлсийг эрэлхийлэх болсон байна.

eBay платформын загварын салбарын дэд ерөнхийлөгч Алексис Хупсийн хэлснээр, жижиг дэгжин цагны эрэлт 2025 онд 2024 онтой харьцуулахад 170 хувиар өссөн байна. Түүнчлэн хуучны Cartier Baignoire загварыг хүмүүс хуучин эдлэлийн сайтаас эрэлхийлж, үнэ нь $1300-оос $10,000 хүртэл өссөн тохиолдол ч гарсан. Үүний улмаас Cartier уг загварыг 2023 оноос дахин үйлдвэрлэж эхэлжээ.

Эмэгтэйчүүд зөвхөн цаг зүүх бус, гоёл чимэглэл зүүж буй мэт мэдрэмж авч, өөрийгөө илэрхийлэх сонирхолтой болж байна. Энэ нь тансаг, өвөрмөц хэв маягийг эрхэмлэдэг шинэ үеийн худалдан авагчдын сэтгэл зүйтэй нягт холбоотой юм.

Эх сурвалж: Wall Street Journal, officelife.media