Хилийн цэргийн 0131 дүгээр ангийн малын суурь дээр үүрэг гүйцэтгэж байсан хугацаат цэргийн алба хаагч 2026 оны гуравдугаар сарын 25-ны өдөр сураггүй болжээ. Тухайн алба хаагч нь үүрэг гүйцэтгэх явцдаа албаны мотоциклтой явсан бөгөөд одоогоор түүнийг эрэн хайх ажиллагаа үргэлжилж байна.

Энэ талаар Хил хамгаалах ерөнхий газрын Олон нийттэй харилцах хэлтсийн дарга, дэд хурандаа У.Пүрэвсүрэнгээс тодруулахад “Хугацаат цэргийн алба хаагч албаны хэрэгцээнд ашиглагддаг мотоциклыг унаж малд явсан бөгөөд эргэж ирээгүй байна. Одоогоор тухайн цэрэг төөрсөн эсэхийг тогтоохоор ажиллаж байна. Мөн сураггүй болсон хугацаат цэргийг хайх ажилд Хилийн цэргийн анги бүрэлдэхүүн, аймгийн Цагдаагийн газрын алба хаагчид болон нутгийн иргэд нэгдэн ажиллаж байна. Үүнээс гадна алба хаагчийн ар гэрийнхэн эрэн хайх ажиллагаанд хамтран оролцож байна” гэлээ.

Тухайн цэрэг нь хангай нутгаас цэргийн албанд татагдан ирсэн бөгөөд говь нутгийн баримжаа муутай байж болзошгүй аж.