Нийслэлийн Засаг дарга бөгөөд Улаанбаатар хотын захирагч Х.Нямбаатар өнгөрсөн оны мөн үед “Би хэдэн халтар төгрөг цуглуулсан ченжүүдээс айхгүй“ хэмээн мэдэгдсэн. Үүний улмаас автомашины худалдаа эрхлэгчид "Үндсэн хуулиар хамгаалсан хүний хүний хөдөлмөрлөх эрхэд халдсан, худал мэдээлэл тараасан" хэмээн шүүхэд гомдол гаргасан байдаг.
Хотын даргын эсрэг гаргасан энэ гомдол үндэслэлтэй болохыг шүүхээс тогтоож, авто машины худалдаа эрхлэгчээс уучлал гуйхыг даалгаж шийдвэрлэсэн байна.
Дээрх маргаан нь хотын даргын гаргасан "Гаалиар орж ирсэн машинд улсын дугаар олгохгүй" гэх шийдвэрээс үүдэлтэй бөгөөд НИТХ-ын ээлжит бус хуралдааны үеэр Хотын дарга Х.Нямбаатар “Би хэдэн халтар төгрөг цуглуулсан ченжүүдээс айхгүй” хэмээн мэдэгдсэнээс үүдэлтэй. Уг мэдэгдлийг “Авто худалдаа, машины бизнес эрхлэгчдийн холбоо”-оос ажил хэргийн нэр хүндэд халдсан гэж үзэн шүүхэд гомдол гаргасан юм.
Нэхэмжлэгч талаас нэр хүндээ сэргээлгэхийн зэрэгцээ нэг тэрбум төгрөгийн нөхөн төлбөр нэхэмжилсэн бөгөөд хэргийг шийдвэрлэх хугацаанд шүүхээс түр арга хэмжээ авч, Х.Нямбаатарын эд хөрөнгө, тэр дундаа дансыг нэхэмжлэлийн үнийн дүн болох нэг тэрбум төгрөгийн хэмжээнд битүүмжлэх шийдвэр гаргаж байжээ.
