Байгаль орчин, уур амьсгалын өөрчлөлтийн яам, НҮБ-ын Байгаль орчны хөтөлбөрийн Копенхагены Уур амьсгалын төв (UNEP-CCC), Азийн технологийн хүрээлэнтэй хамтран Даян дэлхийн байгаль орчны сангийн санхүүжилтээр “Уур амьсгалын өөрчлөлтийн технологийн хэрэгцээ шаардлагын үнэлгээ (TNA)” төслийг 2026-2027 онд хэрэгжүүлэх гэж байна.
Төслийн нээлтийн сургалтыг өнгөрсөн мягмар гарагт зохион байгуулж, үйл ажиллагааг албан ёсоор эхлүүлжээ. Технологийн хэрэгцээ шаардлагын үнэлгээний гол зорилго нь хөгжиж буй орнуудад уур амьсгалын өөрчлөлтийг сааруулах, дасан зохицох технологиудыг тодорхойлох, сонгох, хэрэгжүүлэх төлөвлөгөө боловсруулахад оршиж байгаа юм.
TNA аргачлал нь гурван үндсэн үе шатаас бүрдэнэ. Тодруулбал, технологийг эрэмбэлэн сонгох, саад тотгорын шинжилгээ болон таатай орчин нөхцөлийг тодорхойлох, үйл ажиллагааны төлөвлөгөө боловсруулах зэрэг багтаж байна. Технологийн хэрэгцээ шаардлагыг үнэлэхэд үндэсний байгууллагууд болон салбарын мэргэжилтнүүдийн оролцоо, хамтын ажиллагаа чухал ажээ.
