Монгол Улсын Шадар сайд С.Амарсайхан өнөөдөр Бүгд Найрамдах Итали Улсаас Монгол Улсад суугаа Онц бөгөөд Бүрэн эрхт Элчин сайд Жованна Пиккаррета болон тус улсын Иргэний хамгааллын газрын Гадаад харилцааны хэлтсийн дарга Агостино Горэтти, CIMA сангийн захирал Робэрто Рудари нарыг хүлээн авч уулзлаа. Уулзалтаар хоёр тал онцгой байдлын салбарт хамтын ажиллагаагаа өргөжүүлэн хөгжүүлэх, байгалийн гамшиг, уур амьсгалын өөрчлөлттэй холбоотой эрсдэлтэй тэмцэх чиглэлээр харилцан туршлага солилцох, мэргэжлийн боловсон хүчний чадавхыг нэмэгдүүлэх зэрэг олон чиглэлээр хамтран ажиллах боломжийн талаар санал солилцов.

Монгол Улс сүүлийн жилүүдэд уур амьсгалын өөрчлөлт, ган, зуд, үер, түймэр, газар хөдлөлт зэрэг байгалийн гамшгийн эрсдэлд өртөх нь нэмэгдэж буй нөхцөлд олон улсын хамтын ажиллагаа онцгой ач холбогдолтой болоод байна. Энэ хүрээнд ОБЕГ-ын албан хаагчид Итали Улсаас Азийн найман оронд хэрэгжүүлж буй “Байгалийн гамшгийг тэсвэрлэх чадавх бүхий дэд бүтцийг бий болгох үндэсний хүчин чадлыг нэмэгдүүлэх нь” төсөлд хамрагдаж буйг Шадар сайд онцлон талархал илэрхийлж, сургалт, туршлага хуримтлуулах үйл ажиллагаанд амжилт хүсэв.

Италийн Элчин сайд Жованна Пиккаррета хоёр улсын онцгой байдлын байгууллагууд илүү өргөн хүрээнд, олон талт төсөл хөтөлбөр хэрэгжүүлж хамтран ажиллах бүрэн боломжтойг онцолж, Монголын онцгой байдлын албаны чадавх олон улсын хэмжээнд хүрсэнд талархал илэрхийллээ.

Мөн уулзалтын үеэр хоёр улсын эдийн засаг, технологи, хөдөө аж ахуй, инновац зэрэг салбарын хамтын ажиллагааг гүнзгийрүүлж, шууд нислэг нээх, ноос ноолуурын экспортыг дэмжих, хамтарсан үйлдвэр байгуулах, Евро-Азийн зах зээлд хамтран гарах, бараа эргэлтийг нэмэгдүүлэх зэрэг чиглэлээр өргөн хүрээтэй хэлэлцүүлэг өрнүүлсэн байна.

Энэ жил Монгол Улс, Бүгд Найрамдах Итали Улс хооронд дипломат харилцаа тогтоосны 55 жилийн ой тохиож буй нь хоёр орны уламжлалт найрсаг харилцааг бүх чиглэлд шинэ шатанд гаргах онцгой боломж гэдгийг уулзалтын үеэр талууд тэмдэглэлээ.