"Монголын эдийн засгийн форум-2025" өнөөдөр 09:00 цагт Төрийн ордонд эхэллээ. Хоёр өдөр үргэлжлэх эдийн засгийн форумаар сарын өмнө томилогдсон шинэ Засгийн газар цаашид ямар бодлого баримтлан ажиллах нь илүү тодорхой болно. Форумын эхний өдөр "Монгол Улсын эдийн засгийн тэргүүлэх чиглэл" сэдвээр илтгэл тавигдах аж.
Тэргүүн Шадар сайд бөгөөд Эдийн засаг хөгжлийн сайд Н.Учрал өчигдөр Засгийн газрын ээлжит бус хуралдааны дараа хийсэн мэдээлэлдээ "Энэ жил эдийн засгийн форумыг өндөр түвшинд зохион байгуулна. Гаднаас олон зочид, хөрөнгө оруулагчдыг урьсан байгаа. 1000 гаруй зочин оролцоно. Төсөв мөнгөний хувьд төсөвт тодотгол хийсэн, зардал хэмнэж байгаа учир санхүүжилтийг "Монголын Эдийн засгийн форум" ТББ зохион байгууллага, хувийн хэвшил, гадаадын дотоодын донор байгууллагуудтай хамтран нээлттэй санхүүжилтээ босгосон. Засгийн газрын зүгээс зардал гаргаагүй. Харин төрийн алба хаагчид мандатынхаа зардлыг төлж байгаа. Заал, танхим, бусад зүйлд төсвөөс зардал гаргаагүй" гэсэн байна.
Энэ жилийн форумд төр засгийн 500, хувийн хэвшлийн 700, ТББ-ын 900 орчим хүн оролцохоор бүртгүүлжээ. Форумд оролцохын тулд Монгол Улсын иргэн нэг сая төгрөг, гадаад улсын иргэн 500 ам.доллар төлсөн байна.
Монгол Улсын хөгжлийг хурдасгах зорилго бүхий Монголын Эдийн Засгийн Форум 2010 оноос эхлэн жил бүр зохион байгуулагдаж ирсэн.
Тухайлбал,
2022 онд "Шинэ сэргэлтийн бодлого" .
2023 онд "Улс төрийн соёл, ёс суртахууныг төлөвшүүлж байж тогтвортой хөгжинө"
2024 онд Бүсчилсэн хөгжил-Монголын эдийн засгийн форум" нэртэйгээр зохион байгуулсан байна.
