Монгол Улсын Их Хурлын 2025 оны долдугаар сарын дөрөвний өдрийн нэгдсэн хуралдаан өнөөдөр 10 цагт “Их хуралдай” танхимд болох бөгөөд дараах асуудлуудыг хэлэлцэхээр төлөвлөжээ. Үүнд: Монгол Улсын Үндсэн хуулийн цэцийн 2025 оны тавдугаар дүгнэлтийг танилцуулж, хувь хүний орлогын албан татварын тухай хуулийн 21 дүгээр зүйлийн 21.1 дэх хэсэг Үндсэн хуулийг зөрчсөн эсэх талаарх маргааны шийдвэрийг хэлэлцэнэ. Мөн Нийгмийн даатгалын үндэсний зөвлөлийн гишүүнийг томилох, чөлөөлөх тухай асуудлыг авч хэлэлцэхээр байна.

Түүнчлэн олон хүүхэд төрүүлж өсгөсөн эхчүүдийг урамшуулах тухай хуульд өөрчлөлт оруулах тухай, харьяатын тухай хуульд нэмэлт оруулах тухай, нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулахтай холбоотой нэмэлт, өөрчлөлтийн хуулийн төслүүдийг тус тус хэлэлцэх эсэх асуудлыг хөндөж, асуулт, хариултын 60 минутын хугацаатай хэлэлцүүлэг хийхээр товлоод байна.

Мөн 2025 оны Монгол Улсын төсвийн тухай хуульд оруулах өөрчлөлтүүд, Үндэсний баялгийн сангийн 2025 оны төсвийн тухай, Нийгмийн даатгалын сан болон Эрүүл мэндийн даатгалын сангийн 2025 оны төсөвт тусгах өөрчлөлтийн төслүүдийг дөрөв дэх хэлэлцүүлгийн шатанд үргэлжлүүлэн хэлэлцэхээр төлөвлөсөн байна.

Эх сурвалж: Монгол Улсын Их Хурал