Засгийн газрын ээлжит хуралдаан долоодугаар сарын хоёрны өдөр болж, эрчим хүчний салбарын төрийн өмчит компаниудын бүтцийг оновчтой болгож, засаглалыг сайжруулах, чиг үүргийн давхардал, хийдлийг арилгах, зардлыг бууруулан үр ашгийг дээшлүүлэх зорилгоор зарим арга хэмжээ авахаар шийдвэрлэжээ.

Үүний хүрээнд гарсан Засгийн газрын тогтоолоор дараах зохион байгуулалтын өөрчлөлтүүдийг хийсэн байна. Үүнд:

• “Баруун бүсийн эрчим хүчний систем” ТӨХК, “Алтай-Улиастайн эрчим хүчний систем” ТӨХК-ийг “Цахилгаан дамжуулах үндэсний сүлжээ” ТӨХК-д нэгтгэж, үйл ажиллагааг нь цогц байдлаар удирдуулахаар зохион байгууллаа.

• “Увс цахилгаан түгээх сүлжээ” ХХК, “Ховд цахилгаан түгээх сүлжээ” ХХК, “Дөргөний усан цахилгаан станц” ХХК, Мянгадын нарны цахилгаан станц-ыг нэгтгэн “Баруун бүсийн цахилгаан түгээх сүлжээ” ТӨХК байгууллаа.

• “Алтай-Улиастайн эрчим хүчний систем”-ийн түгээх сүлжээний салбаруудыг нэгтгэн “Алтай-Улиастайн цахилгаан түгээх сүлжээ” ТӨХК болгон өөрчиллөө.

• “Тайшир-Гуулингийн усан цахилгаан станц” ХХК, “Богдын голын усан цахилгаан станц” ХХК, “Тосонцэнгэлийн усан цахилгаан станц” ХХК, Сэрвэний, Мөрөнгийн, Борхын нарны цахилгаан станцууд, Хүнгүй-Галуутайн усан цахилгаан станц-ыг нэгтгэн “Тайшир ногоон эрчим” ТӨХК байгуулж, нэг бүтцэд хамрууллаа.

Ийнхүү өмнө нь бие даан үйл ажиллагаа явуулж байсан есөн компани, тэдний найман салбарыг нэгтгэн дөрвөн компанид төвлөрүүлснээр, салбарын засаглалыг сайжруулж, эрчим хүчний тасралтгүй, найдвартай ажиллагааг хангах, зардлыг хэмнэж, удирдлагын уялдаа холбоог бэхжүүлэх нөхцөл бүрдэхийг Засгийн газар онцолжээ.

Эх сурвалж: Монгол Улсын Засгийн газар