Монгол Улсын 2025 оны төсвийн тодотголтой холбоотой хуулийн төслүүдийг УИХ-ын Нийгмийн бодлогын байнгын хороогоор өчигдөр хэлэлцэн, хоёр дахь хэлэлцүүлгийг явууллаа. Үүнд Монгол Улсын 2025 оны төсвийн тухай хуульд өөрчлөлт оруулах тухай, Үндэсний баялгийн сангийн 2025 оны төсвийн тухай хуульд өөрчлөлт оруулах тухай, Нийгмийн даатгалын сангийн 2025 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2025 оны төсвийн тухай хуульд өөрчлөлт оруулах тухай хуулийн төслүүд болон хамт өргөн мэдүүлсэн бусад хууль, тогтоолын төслүүд багтаж байна.
Төсвийн тодотголын хүрээнд бүх шатны төрийн байгууллагын тэвчиж болох зардлыг хэмнэх бодлогыг баримталж, төрийн албаны орон тоог есөн хувиар бууруулах, төсвийн байгууллагуудын тээвэр шатахуун, дотоод албан томилолт, хичээл сургалт, үйлдвэрлэлийн зардал, өндөр дээд түвшний айлчлал болон хүлээн авалтаас бусад гадаад томилолтын зардал, зочин төлөөлөгч угтах зардал, тавилга, эд хогшил худалдан авах, урсгал засвар хийх, багаж техник худалдан авах, төрийн болон хувийн хэвшлийн байгууллагуудад олгодог татаас, байгууллагаас олгодог нэг удаагийн болон бусад төрлийн тэтгэмж, урамшуулал, хөтөлбөр арга хэмжээний зардлыг танах чиглэлд анхаарчээ.
Тухайлбал, Гэр бүл, хөдөлмөр, нийгэм хамгааллын сайдын багцын төсөв 2025 оны батлагдсан төсвөөс урсгал зардал 32.6 тэрбум, хөрөнгийн зардал 3.5 тэрбум, нийт 36.1 тэрбум төгрөгөөр буурч байгаа бол Эрүүл мэндийн сайдын багцын төсөв нийт 151.1 тэрбум төгрөгөөр, үүнээс урсгал зардал 81.2 тэрбум, хөрөнгийн зардал 69.9 тэрбум төгрөгөөр буурахаар тусгажээ. Үүнтэй холбогдуулан гэр бүл, хөдөлмөр, нийгэм хамгааллын салбарын төрийн албан хаагчийн орон тоог 541-ээр бууруулж 5707 орон тоотой үлдээх, эрүүл мэндийн салбарын төрийн албан хаагчийн орон тоог 2651-ээр бууруулахаар тусгасан байна.
Засгийн газар одоо 16 яам, Ерөнхий сайдаас гадна 19 сайдтай ажиллаж байгаа бөгөөд зарим сайдын чиг үүргийг ижил төстэй үйл ажиллагаа эрхэлдэг бусад сайдын эрхлэх асуудалд шилжүүлж, зохион байгуулалтын өөрчлөлт хийснийг төсвийн тодотголд тусгажээ. Тухайлбал, хилийн бүс дэх тээвэр логистикийн нэгдсэн сүлжээний бодлого, хилийн боомтын хөгжлийн асуудлыг Сангийн сайдын эрхлэх асуудалд, хөгжлийн бодлого төлөвлөлтийн баримт бичгийн хэрэгжилт хяналт тавих асуудлыг Тэргүүн шадар сайд бөгөөд Эдийн засаг хөгжлийн сайдын чиг үүрэгт, 20 минутын хотын хөгжлийн асуудлыг Хот байгуулалт, барилга, орон сууцжуулалтын сайдын чиг үүрэгт тус тус шилжүүлжээ.
Үүний зэрэгцээ Монгол Улсын сайд, Хяналт үйлчилгээний үндэсний хорооны даргын ажлын алба, Монгол Улсын сайд, Боомтын сэргэлтийн үндэсний хорооны даргын ажлын алба, Монгол Улсын сайд, 20 минутын хотын Үндэсний хорооны даргын ажлын албыг татан буулгаж, холбогдох төсвийн өөрчлөлтийг хийсэн байна.
Энэ удаагийн тодотголоор улсын нэгдсэн төсвийн тэнцвэржүүлсэн орлогыг гурван их наяд хоёр зуун жаран тэрбум төгрөгөөр бууруулж, гучин их наяд хоёр зуун есөн тэрбум төгрөгт хүргэж, нэгдсэн төсвийн нийт зарлагыг нэг их наяд найман зуун тавин зургаан тэрбум төгрөгөөр бууруулж, гучин нэгэн их наяд таван зуун далан таван тэрбум төгрөг болгож, улмаар нэгдсэн төсвийн тэнцвэржүүлсэн тэнцэл нэг их наяд гурван зуун жаран таван тэрбум төгрөг буюу дотоодын нийт бүтээгдэхүүний 1.5 хувийн алдагдалтайгаар батлагдахаар төлөвлөжээ.
Эх сурвалж: УИХ
