Монгол Улсын Ерөнхий сайд Г.Занданшатар “Рио Тинто” компанийн Зэсийн группийн захирал Кейти Жаксоныг хүлээн авч уулзлаа. Уулзалтаар “Оюу толгой” төслийн хүрээнд Монгол Улсын эрх ашиг, үр өгөөжийг нэмэгдүүлэх асуудлыг бүхэлд нь авч үзэх, цогц шийдэлд хүрэх шаардлагатайг Ерөнхий сайд онцлон тэмдэглэсэн байна.
Г.Занданшатар уулзалтын эхэнд 2021 онд УИХ-аас баталсан “Оюу толгой ордоос Монгол Улсын хүртэх үр ашгийг нэмэгдүүлэх тухай” 103 дугаар тогтоолын хэрэгжилтэд анхаарал хандуулж, энэ хүрээнд Засгийн газар тууштай ажиллана гэдгийг илэрхийлжээ. Тэрбээр зөвхөн нэг асуудал бус, үйл ажиллагааны ил тод байдал, худалдан авалт, татвар, байгаль орчны менежмент, ялангуяа усны нөөц ашиглалт зэрэг олон асуудлыг цогцоор нь хамтран шийдвэрлэх шаардлагатай гэж үзэж буйгаа тодотголоо.
Үүний тулд дээрх асуудлуудаар нарийн мэргэжлийн бүрэлдэхүүнтэй ажлын хэсэг байгуулах санал дэвшүүлж, “Рио Тинто”-гийн зүгээс шийдлээ хүлээж буй асуудлуудыг ширээний ард суугаад хамтран шийдвэрлэх бүрэн бололцоотойг Ерөнхий сайд илэрхийлсэн байна.
“Рио Тинто” компанийн Зэсийн группийн захирал Кейти Жаксон энэхүү саналыг хүлээн авч, хамтран ажиллахад бэлэн байгаагаа мэдэгдсэн бөгөөд ил тод, үр дүнтэй харилцаа тогтоох нь төслийн цаашдын тогтвортой хөгжилд чухал нөлөөтэйг хүлээн зөвшөөрчээ.
Тус уулзалтад “Эрдэнэс Монгол” нэгдлийн гүйцэтгэх захирал С.Наранцогт, “Рио Тинто Монгол” компанийн гүйцэтгэх захирал Х.Амаржаргал, тус компанийн Өсөлт хөгжил хариуцсан захирал С.Мөнхсүх нар оролцсон байна.
Эх сурвалж: ЗГХМОНХГ
