Улсын Их Хурлын дэд дарга Х.Булгантуяад өнөөдөр, 2025 оны зургаадугаар сарын 26-ны өдөр Монгол Улсын сайд, Засгийн газрын Хэрэг эрхлэх газрын дарга С.Бямбацогт Эрчим хүчний тухай хуульд нэмэлт, өөрчлөлт оруулах тухай хуулийн төслийг албан ёсоор өргөн мэдүүллээ.
С.Бямбацогт сайдын танилцуулснаар энэхүү хуулийн төслийг Монгол Улсын Үндсэн хууль, Үндэсний аюулгүй байдлын үзэл баримтлал болон улсын урт, дунд хугацааны хөгжлийн бодлогын хүрээнд боловсруулсан бөгөөд Монгол Улсын эдийн засгийн олон тулгуурт бүтцийг бүрдүүлэх, эрчим хүчний салбарт либералчлал хийж, найдвартай эх үүсвэртэй болох зорилгыг агуулжээ.
Сүүлийн жилүүдэд эрчим хүчний салбарт мега төсөл хэрэгжүүлэх шаардлага улам бүр нэмэгдэж байгаа ч санхүүжилт, хөрөнгө оруулалтын эх үүсвэр, эрх зүйн орчны тодорхой бус байдал уг төслүүдийг гацахад хүргээд байгаа. Иймд Эрчим хүчний тухай хуульд дараах чиглэлүүдэд нэмэлт, өөрчлөлт оруулахаар төлөвлөсөн байна. Үүнд:
-
Эрчим хүчний төслийг сонгон шалгаруулах шалгуур үзүүлэлтийг хуульчилж, эрх зүйн тодорхой байдлыг хангах
-
Эрчим хүч нийлүүлэх үнэ, хэмжээ, нийлүүлэх хугацаа, төрд шилжүүлэх нөхцөл зэрэг шалгууруудаар сонгон шалгаруулалт хийх эрх зүйн үндэс бүрдүүлэх
-
Төр, хувийн хэвшлийн түншлэлийн зохицуулалтыг сайжруулах
-
Өрийн удирдлагын тухай хуульд нэмэлт оруулж, хөрөнгө оруулалтын чадамж бүхий оролцогчдыг дэмжих боломж бүрдүүлэх
Эдгээр өөрчлөлтүүдийг хийснээр төрийн бодлогын хүрээнд эрчим хүчний салбарын либералчлал бодитоор хэрэгжиж эхлэх бөгөөд томоохон төслүүдийг хөрөнгө оруулалт, түншлэлийн үндсэн дээр нээлттэй, шударга шалгаруулалтаар хэрэгжүүлэх нөхцөл бүрдэнэ. Энэ нь эрчим хүчний нийлүүлэлтийн тогтвортой байдал, аюулгүй байдлыг хангах үндэс болохын зэрэгцээ эдийн засгийн өсөлт, ажлын байр нэмэгдүүлэх, иргэдийн ая тухтай амьдралд шууд нөлөө үзүүлэх хөшүүрэг гэж төсөл санаачлагч тайлбарлаж байна.
Хуулийн төсөлтэй хамтаар “Төр, хувийн хэвшлийн түншлэлийн тухай хуульд нэмэлт, өөрчлөлт оруулах тухай” болон “Өрийн удирдлагын тухай хуульд нэмэлт оруулах тухай” төслүүдийг ч мөн өргөн мэдүүлсэн бөгөөд эдгээр нь уялдаа холбоотой, цогц шинэчлэлийг зорьсон алхам юм.
Эх сурвалж: Улсын Их Хурлын Хэвлэл мэдээллийн газар
