Улсын Их Хурал, Засгийн газрын гишүүн, шинээр томилогдсон Батлан хамгаалахын сайд Д.Батлут 2025 оны зургаадугаар сарын 26-ны өдөр үүрэгт ажилдаа орсны дараах анхны өргөтгөсөн шуурхай хуралдаанаа хийлээ. Уг хуралдаанд Зэвсэгт хүчний жанжин штабын дарга хошууч генерал С.Ганбямба, Батлан хамгаалах яамны төрийн нарийн бичгийн дарга бригадын генерал Д.Ганхуяг болон салбарын бусад удирдлагууд оролцож, хариуцсан нэгжийн үйл ажиллагаа, онцлог болон тулгамдаж буй асуудлуудаа танилцуулсан юм.

Хуралдааны үеэр Батлан хамгаалахын сайд Д.Батлут салбарын шинэ бодлого, зорилт, хэтийн төлөвийг илэрхийлж, үндэсний сөрөн тэсвэрлэх чадавхыг бэхжүүлж, аливаа эрсдэл, сорилтыг хохирол багатай даван туулах, үндэсний дархлааг олон түвшинд төлөвшүүлэх зорилго бүхий хөтөлбөр, арга хэмжээнүүдийг хэрэгжүүлэхээ мэдэгдлээ.

Тэрээр дараах чиглэлүүдэд онцгой анхаарч ажиллахаар төлөвлөж байна:

• Батлан хамгаалах салбарын хууль эрх зүйн орчныг шинэчлэх, шаардлагатай хуулийн төслүүдийг боловсруулж өргөн барих, хэлэлцүүлэх

• Хүний хөгжлийг дээдэлсэн “Хүн төвтэй бодлого”-ын хүрээнд алба хаагчдын мэдлэг, ур чадварыг сайжруулах, тэдний нийгмийн хамгааллыг үе шаттайгаар сайжруулах

• Зэвсэглэл, техник хэрэгслийг шинэчлэх, сэргээн сайжруулах бодлогыг үргэлжлүүлэх

• Орчин үеийн цэргийн технологи, тоног төхөөрөмжийг нэвтрүүлэх суурь хөгжлийг хангах

• Кибер аюулгүй байдлыг бэхжүүлэх, мэдээллийн аюулгүй байдлын хамгаалалтыг сайжруулах

• Батлан хамгаалах салбарын төсвийг нэмэгдүүлэхэд бодлогын түвшний анхаарал хандуулах

• Эх оронч үзлийг хүүхэд, залуу үед гүн төлөвшүүлэх, цэргийн суурь мэдлэг олгох хөтөлбөрийг боловсронгуй болгох

Сайд Д.Батлут салбарын үйл ажиллагаанд хүн төвтэй хандлага нэвтрүүлэх ёстойг онцолж, “Хүнээ өнгөлж байж салбар өнгөлөг болно. Удирдлагууд би биш, бид гэсэн зарчмаар урагшлах ёстой” хэмээн уриаллаа. Мөн салбарын бодит нөхцөл байдалтай газар дээр нь танилцахаар ажиллах төлөвлөгөөгөө илэрхийлсэн байна.

Батлан хамгаалах яамнаас өгсөн мэдээллээр энэ хуралдаан нь шинэ Засгийн газрын зүгээс хүний хөгжил, үндэсний аюулгүй байдалд суурилсан, тогтвортой хамгаалалтын тогтолцоог бүрдүүлэх зорилго дор эхэлж буй бодит үйл ажиллагааны эхлэл гэдгийг онцолжээ.

Эх сурвалж: Монгол Улсын Батлан хамгаалах яам