Улсын Их Хурлын ээлжит чуулганы энэ өдөр (зургаадугаар сарын 26-ны Лхагва гараг) 10 цаг 05 минутад эхэлж, 57.1 хувийн ирцтэйгээр үргэлжиллээ. Чуулганы нэгдсэн хуралдаанаар нийт зургаан асуудлыг хэлэлцэхээр товлосон бөгөөд эхэнд нь УИХ-ын дэд дарга Х.Булгантуяа хэд хэдэн хуулийн төслүүдийг холбогдох байнгын хороодод хуваарилсан талаарх мэдээллийг танилцуулсан юм.
Тодруулбал, Засгийн газраас 2025 оны улсын төсвийн тухай хууль болон дагалдах дөрвөн хуулийн төсөл болох Үндэсний баялгийн сан, Нийгмийн даатгалын сан, Эрүүл мэндийн даатгалын сангийн 2025 оны төсөвт оруулах нэмэлт, өөрчлөлтийн төслүүдийг өргөн мэдүүлснийг Төсвийн байнгын хороонд шилжүүлжээ. Мөн УИХ-ын гишүүн Х.Булгантуяа болон бусад 16 гишүүн хамтран өргөн мэдүүлсэн УИХ-ын чуулганы хуралдааны дэгийн тухай хуульд оруулах өөрчлөлтийн төслийг Төрийн байгуулалтын байнгын хороонд хуваарилсан байна.
Уг төсвийн хуулийн төслүүдийг яаралтай горимоор хэлэлцэх эсэх дээр санал хураахад оролцсон гишүүдийн 67.5 хувь нь дэмжсэн нь чуулганы хэлэлцэх асуудлыг хурдасгах үндэслэл болсон. Үүний дараагаар Хууль тогтоомжийн тухай хуульд нэмэлт, өөрчлөлт оруулах тухай болон хамт өргөн мэдүүлсэн хууль, тогтоолын төслүүдийн эцсийн хэлэлцүүлгийг явууллаа. Уг төслийн анхны хэлэлцүүлэг зургадугаар сарын 20-нд болсон бөгөөд түүнийг эцсийн хэлэлцүүлэгт бэлтгэх чиглэлээр Хууль зүйн байнгын хороо ажилласан байна.
Эцсийн хэлэлцүүлэгт гишүүдийн зүгээс зарчмын зөрүүтэй болон найруулгын саналуудаар санал хураалт явуулж, төслүүдийн агуулга, бүтэц, хэл найруулгыг тодорхой хэмжээнд сайжруулсан байна. Хуралдааны явцад УИХ-ын гишүүд асуулт асууж, тайлбар, хариулт авч, саналын томьёоллуудаар тус бүрд нь санал хураалт хийжээ.
Үүний дараа Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслийг хэлэлцсэн бөгөөд П.Сайнзориг гишүүн уг төслийн танилцуулгыг хийв. Төслийн анхны хэлэлцүүлэг мөн энэ сарын 20-ны өдөр болсон ба гүйцээн боловсруулах чиглэл өгсөн дагуу ажлын хэсгээс боловсруулсан дөрвөн зарчмын зөрүүтэй саналаар санал хураалт хийж, шийдвэрлэсэн байна. Мөн хуулийн хэрэгжилттэй холбогдуулан авах арга хэмжээний тухай УИХ-ын тогтоолын төслийг боловсруулж, Хууль зүйн байнгын хороогоор хэлэлцүүлсэн нь олонхын дэмжлэг хүлээсэн байна.
Хуралдааны төгсгөлд УИХ-ын гишүүн Б.Жаргалан нарын 40 гишүүний өргөн мэдүүлсэн Үндэсний их баяр наадмын тухай хуульд нэмэлт, өөрчлөлт оруулах тухай хуулийн төслийг хэлэлцэх эсэх асуудлыг авч үзсэн. Төслийг санаачлагчдын зүгээс Тулгар төр, Их Монгол Улс, Ардын хувьсгал, Ардчилсан хувьсгал, Үндэсний эрх чөлөөний хувьсгал зэрэг түүхэн ойнуудыг улсын баяр наадамтай хамтатган тэмдэглэхийг хуульчилж өгөх шаардлага байгааг онцлон тэмдэглэсэн.
Хуулийн төслийг үзэл баримтлалын хүрээнд хэлэлцэхийг Байнгын хорооны гишүүдийн 66.7 хувь дэмжсэн бол УИХ-ын чуулганы санал хураалтаар 90 гишүүн оролцож, 64.4 хувь нь дэмжсэн тул Төрийн байгуулалтын байнгын хороонд шилжүүлж, анхны хэлэлцүүлэгт бэлтгүүлэхээр шийдвэрлэсэн байна. Хуулийн төсөлтэй холбогдуулан УИХ-ын гишүүн Ч.Номин, Г.Очирбат нар санал бодлоо илэрхийлж, үндэсний спортын харилцааг тусгайлсан хуулиар зохицуулах шаардлагатайг дурдсан нь анхаарал татав.
Ийнхүү төсвийн тодотгол, хууль тогтоомжийн өөрчлөлтүүд болон үндэсний баяр наадмын тухай хуулийн шинэчлэл зэрэг олон нийтийн анхаарал татсан асуудлуудыг УИХ-ын үдээс өмнөх хуралдаанаар хэлэлцэн, заримыг нь эцсийн шатанд шилжүүлсэн бол заримыг нь анхны хэлэлцүүлэгт бэлтгүүлэхээр холбогдох байнгын хороонд шилжүүлснээр хуралдаан завсарлалаа.
