Улсын Их Хурлын Төрийн байгуулалтын байнгын хороо 2025 оны зургаадугаар сарын 25-ны өдрийн хуралдаанаараа Байнгын хорооны даргыг сонгох асуудлыг хэлэлцэж, УИХ-ын гишүүн Цэндийн Сандаг-Очирыг нэр дэвшүүлэхийг дэмжлээ.
УИХ дахь МАН-ын бүлгээс түүний нэрийг албан ёсоор дэвшүүлсэн бөгөөд хуралдаан даргалагч намын саналыг танилцуулсан юм. Ц.Сандаг-Очир нь Төв аймгийн Баяндэлгэр суманд 1977 онд төрсөн бөгөөд эхнэр, дөрвөн хүүхдийн хамт амьдардаг. Боловсролын хувьд тэрээр:
-
1995 онд Багануур дүүргийн 66-р дунд сургуулийг
-
2000-2004 онд Тэнгэр дээд сургуулийг философич, нийгмийн ухааны багшаар
-
2001 онд Удирдлагын академийг төрийн удирдлагын менежер
-
2018 онд төрийн удирдлагын магистр зэрэгтэйгээр тус тус төгссөн байна.
Төрийн албанд 2000 оноос хойш тасралтгүй ажилласан түүхтэй бөгөөд тэрээр Багануур дүүргийн нийгмийн ажилтан, хэвлэл мэдээллийн мэргэжилтнээр эхэлж, улмаар:
-
2005-2008 онд МАН-ын хорооны дэд дарга
-
2008-2012, 2016-2020 онд Багануур дүүргийн Засаг даргаар хоёр удаа
-
2013 оноос тус дүүргийн МАН-ын хорооны даргаар
-
Дүүргийн болон нийслэлийн ИТХ-д тус бүр хоёр удаа
-
2020, 2024 онд УИХ-ын гишүүнээр тус тус сонгогдсон байна.
УИХ-д ажилласан туршлага, төрийн албанд хуримтлуулсан мэдлэг, ур чадварыг нь харгалзан, байнгын хорооны даргад нэр дэвшүүлж буйг хуралдаанд онцолсон бөгөөд бусад гишүүдээс нэмэлт санал, асуулт гараагүй. Иймд хуралдаанд оролцсон гишүүдийн олонх дэмжиж, уг шийдвэрийг УИХ-ын нэгдсэн чуулганд танилцуулахаар тогтжээ.
Эх сурвалж: УИХ-ын Төрийн байгуулалтын байнгын хороо
