Улсын Их Хурлын Хүний эрхийн дэд хороо 2025 оны зургаадугаар сарын 25-ны өдрийн хуралдаанаараа “Гадаад улс дахь Монгол Улсын иргэний эрх, хууль ёсны ашиг сонирхлыг хамгаалах талаар авч хэрэгжүүлэх зарим арга хэмжээний тухай” тогтоолын төслийг хэлэлцэн, баталлаа. Хуралдаан гишүүдийн 60 хувийн ирцтэйгээр 10:14 цагт эхэлсэн байна.
Тогтоолын төслийг Дэд хорооны дарга С.Эрдэнэболд танилцуулсан бөгөөд БНСУ-д зорчсон Монгол Улсын иргэд олноороо хил дээрээс буцаж байгаа асуудал, иргэдийн гомдол, Хүний эрхийн Үндэсний Комисст ирсэн мэдээллүүдэд үндэслэн судалгаа хийж, олон байгууллагатай хамтран ажилласан болохыг дурдсан юм. Үүнд Гадаад харилцааны яам, ХЗДХЯ, Хүний эрхийн Үндэсний Комисс, ТББ-ууд оролцжээ.
Гишүүд асуудлыг хэлэлцэх явцад:
-
Ц.Сандаг-Очир гишүүн БНСУ-д зорчих иргэдийг визийн шаардлагаас түр чөлөөлөх боломж байгаа эсэхийг тодруулсан. Харин ГХЯ-ны Консулын газрын дарга Б.Болд хэлэхдээ Монгол иргэдийн хууль бус оршин суулт өндөр байгаа нь уг асуудлыг шийдвэрлэхэд хүндрэл үүсгэдэг хэмээв. Одоогийн байдлаар БНСУ-д 55 мянга гаруй монгол иргэн байгаагаас 34.5 хувь нь хууль бус оршин сууж байгаа аж.
-
Б.Бат-Эрдэнэ гишүүн Монгол-Солонгосын бүлгийн гишүүний хувьд визгүй зорчих асуудлыг удаа дараа хөндөж ирсэн гэдгээ онцлов.
-
Б.Энхболд (Хүний эрхийн Үндэсний Комисс) БНСУ-ын Хүний эрхийн Комисстой санамж бичиг байгуулж, монгол иргэдийн эрхийн асуудлаар хамтарсан төлөвлөгөө гаргахаар тохирсон тухай мэдээлэл өгчээ.
Мөн хуралдаанд:
-
Хууль зүйн атташе томилох
-
Иргэдэд шаардлагатай мэдээллийг системтэй хүргэх
-
Элчин сайдын яамдын үүргийг идэвхжүүлэх
-
Хүний эрхийн Комиссын гадаад хамтын ажиллагааг өргөжүүлэх
зэрэг бодлогын саналууд дэвшүүлж, гишүүд үг хэлж байр сууриа илэрхийлсэн байна.
Санал хураалтын дүнд гишүүдийн олонхын санал авснаар тогтоолын төсөл батлагдсан бөгөөд Монголын төр гадаадад байгаа иргэдийнхээ эрхийг хамгаалах чиглэлээр илүү идэвхтэй ажиллах хууль, бодлогын үндэслэлтэй боллоо.
Эх сурвалж: Улсын Их Хурлын Хэвлэл мэдээллийн алба.
