Монгол Улсын Ерөнхий сайд Г.Занданшатар 2025 оны зургаадугаар сарын 24-ний өдөр хилийн чандад суугаа дипломат төлөөлөгчийн газрын тэргүүн нартай цахим уулзалт хийж, Засгийн газрын бодлого, үйл ажиллагааны талаар танилцуулан, гадаад бодлого, эдийн засгийн хамтын ажиллагааг уялдуулан үр дүнтэй ажиллах чиглэл өглөө. Уулзалтад нийт 34 Элчин сайд, Ерөнхий консул, Консул болон Гадаад харилцааны яамны газар, нэгжийн удирдлага оролцсон байна.

Ерөнхий сайд олон улсын нөхцөл байдал хурдацтай өөрчлөгдөж, эдийн засагт сөрөг нөлөө үзүүлж буй энэ үед гадаад бодлогын уялдаа, хариуцлага, бодит үр дүнг чухалчилж, дипломат төлөөлөгчийн газрын тэргүүн нарыг энхийг эрхэмлэсэн, нээлттэй, бие даасан, олон тулгуурт гадаад бодлогын зарчмыг тууштай баримтлан ажиллахыг онцгойлон үүрэг болголоо.

Тэрбээр “Засгийн газрын үйл ажиллагаа тасралтгүй, тогтвортой, залгамж чанартай байх ёстой. Энэ хүрээнд төрийн бүтцийг цомхон, уялдаа холбоотой, хариуцлага төвлөрсөн байдлаар шинэчлэх нь хэмнэлтийн арга хэмжээ төдийгүй бодлого хэрэгжилтийг сайжруулах стратегийн алхам” хэмээн тодотгов. Мөн Засгийн газар “Хэмнэлтийн тодотгол” нэртэй бүтцийн шинэчлэлийн багц хуулийг УИХ-д өргөн барихаар хэлэлцэж байгааг мэдэгдэв.

Гадаад орчин тогтвортой байх нь улс орны хөгжлийн үндэс тул, дипломат төлөөлөгчийн газрын тэргүүнүүдийг экспортыг нэмэгдүүлэх, хөрөнгө оруулалт татах, төлбөрийн тэнцлийг сайжруулах, эдийн засгийн хүндрэлүүдийг шийдвэрлэхэд гол үүрэгтэй оролцохыг шаардав. Тэдний санал, санаачилгыг Засгийн газар бодитоор дэмжихээ Ерөнхий сайд илэрхийллээ.

Түүнчлэн гадаад бодлогын нэгдмэл байдлыг хангах үүднээс нэг цонхны зарчим, хууль тогтоомж, бодлогын баримт бичгийг чанд мөрдөх шаардлагатайг сануулж, гадаад арга хэмжээ, уулзалтуудыг зохион байгуулахдаа Гадаад харилцааны яамтай заавал зөвшилцөхийг үүрэг болгов.

Уулзалтын үеэр ОХУ, БНХАУ-д суугаа Элчин сайд нар хоёр талын хамтын ажиллагааны өнөөгийн нөхцөл, тулгамдсан асуудлын талаар танилцуулж, цаашдын үйл ажиллагаанд хэрэгжүүлэх чиглэлийг Ерөнхий сайдаас авчээ.

Эх сурвалж: Засгийн газрын хэвлэл мэдээлэл, олон нийттэй харилцах газар.