Улсын Их Хурлын Төрийн байгуулалтын байнгын хороо 2025 оны зургаадугаар сарын 24-ний өдрийн хуралдаанаараа Монгол Улсын Их Хурлын тухай хуульд нэмэлт, өөрчлөлт оруулах тухай хэд хэдэн хуулийн төслүүдийн хэлэлцэх эсэх асуудлыг авч хэлэлцэв.

Хуралдаанд эхлээд УИХ-ын гишүүн Х.Тэмүүжин нарын 11 гишүүний өргөн мэдүүлсэн хуулийн төслийг хэлэлцсэн байна. Тус төсөл нь Ерөнхий сайд болон Засгийн газрын гишүүд парламентад үнэн бодит мэдээлэл өгөх үүргийг тодорхой болгох, УИХ-ын хяналтын механизмыг үр дүнтэй болгох, парламент дахь "Асуулгын цаг"-ийг албан ёсоор хуульчлах зорилготой юм. Түүнчлэн УИХ-ын чуулганы хуралдааны дэгт холбогдох өөрчлөлт оруулж, худал мэдээлэл өгсөн тохиолдолд хариуцлага хүлээлгэх нөхцөлийг тусгасан байна.

Мөн Х.Тэмүүжин нарын 40 гишүүний өргөн мэдүүлсэн хуулийн төсөлд УИХ-ын чуулганы танхимын зохион байгуулалт, гишүүдийн байр суурийг илэрхийлэх боломж, тэгш мэтгэлцээний орчныг хангах зохицуулалтуудыг тусгаж, парламентын ардчиллын зарчмыг баталгаажуулахыг зорьжээ. Энэ асуудлаар МАН-ын бүлэг завсарлага авснаар хэлэлцүүлгийг хойшлуулсан байна.

Дараагийн хэлэлцсэн асуудал нь УИХ-ын гишүүн Б.Бат-Эрдэнийн танилцуулсан, агаарын бохирдолтой тэмцэх зорилго бүхий нэмэлт өөрчлөлтийн төсөл байв. Тус төсөл нь “Агаар орчны бохирдлыг бууруулах дэд хороо”-г Байгаль орчин, хүнс, хөдөө аж ахуйн байнгын хорооны дэргэд байгуулж, уг асуудлыг системтэй хариуцан ажиллуулах эрх зүйн үндсийг бүрдүүлэх зорилготой юм. Энэ нь иргэдийн амьдрах орчны эрхийг хангах Үндсэн хуулийн заалтыг хэрэгжүүлэх бодлогын нэг хэсэг хэмээн тодотгожээ.

Хуралдааны сүүлд УИХ-ын гишүүн А.Ариунзаяа нарын өргөн барьсан хуулийн төслийг хэлэлцсэн байна. Энэ төсөлд Байнгын хорооны бүтэц, чиг үүргийг шинэчлэх, зарим байнгын хороог нэгтгэх, зарим дэд хороог шинээр байгуулах тухай заалтууд тусгагджээ. Тухайлбал:

• Өргөдлийн байнгын хороог шинээр байгуулах

• Аж үйлдвэржилтийн болон Инновац, цахим бодлогын байнгын хороог Эдийн засгийн байнгын хороонд нэгтгэх

• Ёс зүй, дэгийн байнгын хороог Төрийн байгуулалтын байнгын хороонд нэгтгэх

• Байгаль орчны байнгын хороонд “Агаар орчны бохирдлын дэд хороо” байгуулах зэрэг зохицуулалт багтсан байна.

Мөн УИХ-ын даргын дэргэдэх зөвлөлийн бүрэлдэхүүнд бүлэг байгуулаагүй нам, эвслийн төлөөллийг саналын эрхтэйгээр, бүлгийн дэд дарга нарыг саналын эрхгүйгээр оролцуулах санал дэвшүүлжээ.

Эдгээр хуулийн төслүүдтэй холбогдуулан гишүүд зарчмын асуулт асуух, санал хэлэхээс зайлсхийсэн ч олонхын саналаар хэлэлцэхийг дэмжсэн байна.

Эх сурвалж: Улсын Их Хурлын Хэвлэл мэдээллийн газар.