Монгол Улсын Их Хурлын гишүүн Д.Үүрийнтуяа, Б.Уянга, С.Эрдэнэбат, С.Эрдэнэболд нар “Олон хүүхэд төрүүлж өсгөсөн эхийг урамшуулах тухай хуульд өөрчлөлт оруулах тухай” хуулийн төслийг 2025 оны зургаадугаар сарын 24-ний өдөр УИХ-ын дарга Д.Амарбаясгаланд өргөн мэдүүллээ.
Төсөлд тусгаснаар нэг нас хүрээгүй хүүхдээ алдсан эхчүүдийг одоогийн эрх зүйн орчноос гадуур орхигдуулахгүй байх, ялгаварлалгүйгээр урамшууллын тогтолцоонд хамруулах зорилготой. Мөн хүн амын өсөлтийг дэмжих бодлоготой уялдуулан олон хүүхэд төрүүлсэн эхэд олгох шалгуурыг хөнгөлөх, илүү хүн төвтэй болгохыг зорьжээ.
Хуулийн одоогийн зохицуулалтаар “Эхийн алдар” хоёрдугаар зэргийн одонг дөрөв ба түүнээс дээш хүүхэд төрүүлсэн эхэд, нэгдүгээр зэргийн одонг зургаан хүүхэдтэй эхэд олгож байгаа. Гэвч “бага хүүхэд нь нэг нас хүрсэн байх”, “нас барсан хүүхэд нь нэг ба түүнээс дээш настай байх” гэсэн шаардлагууд нь хүүхдийн наснаас хамаарч ялгаварлан гадуурхах нөхцөл бүрдүүлдэг гэж хууль санаачлагчид үзжээ.
Шинэчилсэн найруулгаар эдгээр болзлыг хасч, эхчүүдийн эрхийг илүү өргөн хүрээнд хамгаалах, тэдний сэтгэлзүйн болон эдийн засгийн дэмжлэгийг нэмэгдүүлэхийг зорьсон байна. Хуулийн үйлчлэх хүрээнд мөн гурав хүртэлх насны хүүхдийг үрчлэн авсан эхчүүд, байгалийн аюулт үзэгдэл, осол, өвчин, гэмт хэргийн улмаас хүүхдээ алдсан тохиолдолд ч хамруулах эрх зүйн үндсийг тодорхой болгож өгсөн байна.
Ийнхүү төрөөс хүн төвтэй хууль эрх зүйн орчныг бүрдүүлж, хүний эрх, эрхэм чанарыг хүндэтгэх үүргээ хэрэгжүүлж эхлэх чухал алхам болж байгааг УИХ-ын гишүүд онцоллоо.
Эх сурвалж: Монгол Улсын Их Хурлын Хэвлэл мэдээллийн газар.
