Өнөөдөр үдээс хойш хуралдсан УИХ-ын нэгдсэн чуулганаар Засгийн газрын бүтэц бүрэлдэхүүний тухай хуулийн төслийн хэлэлцэх эсэхийг хэлэлцсэн. Чуулганы хуралдаан 16.00 цагт эхэлсэн. Хууль санаачлагч буюу Засгийн газрын мэдээллийг Ерөнхий сайд Г.Занданшатар танилцуулж, гишүүд асуулт асууж, үгээ хэлсний дараа 18.00 цагт санал хураалгахаар болсон боловч техникийн шалтгаанаар санал хураалтыг хойшлуулав.
Тодруулбал, өнөөдөр үдээс Улаанбаатарт түр хугацааны ширүүн бороо орсны улмаас Төрийн ордонд хоёр удаа цахилгаан тасарсан байна. Үүний улмаас санал хураалтын төхөөрөмжийн хэвийн ажиллагааг шалгахын тулд хоёр ч удаагийн туршилтын санал хураалт явуулж, хуулийн төслийн санал хураалтыг 20 минутын дараа явуулав.
