Монгол Улсын Их Хурлын гишүүн, Эрүүл мэндийн сайд Ж.Чинбүрэн өнөөдөр Азийн хөгжлийн банк (АХБ)-ны Монгол Улс дахь захирал хатагтай Шаннон Коулин болон түүний албаны төлөөллийг хүлээн авч уулзлаа. Уулзалтын үеэр хоёр тал өнгөрсөн хугацаанд эрүүл мэндийн салбарт хамтран хэрэгжүүлсэн олон талт төсөл, хөтөлбөрүүдийн үр дүнг дүгнэн, цаашдын хамтын ажиллагааны талаар санал солилцов.

Сайд Ж.Чинбүрэн Азийн хөгжлийн банкыг Монгол Улсын эрүүл мэндийн салбарын гол хөгжлийн түнш хэмээн онцолж, анхан шатны тусламж үйлчилгээний тогтолцоог боловсронгуй болгох, эмнэлгийн тусламж үйлчилгээ, санхүүгийн удирдлага, хүний нөөцийн чадавхыг бэхжүүлэх зэрэг олон чиглэлд хамтран ажиллаж ирснийг тэмдэглэв.

Хатагтай Шаннон Коулин уулзалтын үеэр хэрэгжүүлж буй болон төлөвлөгдөж буй хөрөнгө оруулалт, техникийн туслалцааны төслүүдийг танилцуулж, шинэ санаачилгуудыг хуваалцсан байна.

Мөн Сайд Ж.Чинбүрэн яамнаас хэрэгжүүлж буй төслүүдийн хэрэгжилтийн явц, тулгарч буй бэрхшээлүүдийг хөндөн ярилцаж, цаашид хэрэгжүүлэх арга хэмжээг тодорхойлох үүднээс дахин уулзалт зохион байгуулах санал тавьжээ. Тэрбээр яамны холбогдох албадын түвшинд төслийн явцыг нягтлан үзэж, хамтын ажиллагааг үр дүнтэй үргэлжлүүлэхээр зорьж буйгаа илэрхийлсэн байна.

Эх сурвалж: Эрүүл мэндийн яам