Монгол Улсын Засгийн газрын гишүүн, Зам, тээврийн сайд Б.Дэлгэрсайхан БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань тэргүүтэй төлөөлөгчдийг хүлээн авч уулзлаа. Уулзалтаар хоёр тал 2024–2028 оны Засгийн газрын үйл ажиллагааны хөтөлбөрт тусгагдсан Гашуунсухайт-Ганцмод, Ханги-Мандал, Шивээхүрэн-Сэхээ хилийн боомтуудын хил дамнасан төмөр замын төслийн талаар харилцан санал солилцов.

Сайд Б.Дэлгэрсайхан, хоёр орны хамтын ажиллагааны хүрээнд Гашуунсухайт-Ганцмод боомтын төмөр замын бүтээн байгуулалтын нээлтийн ажиллагааг амжилттай зохион байгуулж, улмаар барилгын гэрээг албан ёсоор баталгаажуулах хүртэл Элчин сайд болон ЭСЯ-ны зүгээс үзүүлсэн дэмжлэгт талархал илэрхийллээ.

Мөн энэ сарын 24-нд Тавантолгой–Гашуунсухайт чиглэлийн төмөр замаар нүүрс тээвэрлэх нээлтийн ажиллагаа болох гэж буйтай холбогдуулан Элчин сайд Шэнь Миньжуаньд албан ёсны урилга гардуулан өгсөн байна.

Элчин сайд Шэнь Миньжуань уулзалтын үеэр, “Таныг шинэ Засгийн газарт сайдаар үргэлжлүүлэн ажиллаж байгаад баяр хүргэе. 2014 онд хоёр улсын төрийн тэргүүн нарын баталсан иж бүрэн стратегийн түншлэлийн хамтарсан тунхаг бодит ажил болон хэрэгжиж эхэлсэн нь харилцааны ахиц дэвшлийн илрэл юм” хэмээн онцоллоо.

Түүнчлэн, Шивээхүрэн–Сэхээ, Ханги–Мандал, Бичигт–Зүүнхатавч зэрэг бусад хилийн боомтуудыг төмөр замаар холбох асуудлыг ч дэмжин ажиллах бэлэн байдлаа илэрхийлсэн байна.

Монгол Улсын зүгээс боомтын дэд бүтцийг хөгжүүлэхдээ ачааны урсгалыг нэмэгдүүлэх, худалдааны эргэлтийг өргөжүүлэх зорилтыг давхар хэрэгжүүлэх шаардлагатай байгааг онцолжээ.

Уулзалтын төгсгөлд, Элчин сайд Шэнь Миньжуань Тавантолгой–Гашуунсухайт чиглэлийн төмөр замын нээлтийн ажиллагаанд биечлэн оролцохоо илэрхийлсэн байна.

Эх сурвалж: Монгол Улсын Засгийн газар.