Ерөнхий сайд Г.Занданшатар өчигдөр Эрчим хүчний яаманд ажилласан байна. Эрчим хүчний салбарт үүссэн нөхцөл байдалтай танилцаж, холбогдох албаныхантай хэлэлцжээ. Уг асуудлаар Ерөнхий сайд Г.Занданшатар дараах дараах байр суурийг илэрхийлсэн байна.

-Ерөнхий сайд Г.ЗАНДАНШАТАР:

-"Эрчим хүчний сайдын үүрэг даалгавраар ажлын хэсэг гаргах байх. Техник, тоног төхөөрөмжийн юм уу, хувь хүний хариуцлагатай холбоотой асуудлууд шалгагдаж байна. Энэ нөхцөл байдал нь эрчим хүчний салбарын үйл ажиллагаанд мэргэжлийн хяналт шалгалт, хөндлөнгийн хяналт шалгалтыг нэг талаараа хийдүүлж, нөгөө талаараа давхардуулж, мэргэжлийн инженер техникийн ажилтнуудын өдөр тутмын үйл ажиллагаанд хүндрэл учруулах болсон байна гэж дүгнэж байна.

Сэргээгдэх эрчим хүч, Эрдэнэбүрэнгийн усан цахилгаан станц гээд ер нь л эрчим хүчний салбарт ашиг сонирхлын зөрчлөөс үүдэлтэй, аль эсвэл албан тушаалын зөрөлдөөнөөс үүдэлтэй зөрчилдөөн сүүлийн 20-иод жил явж ирсэн. Үүний улмаас V цахилгаан станц барих асуудал одоо хүртэл тасалдсан.

Миний мэдэхээр Тавантолгойн цахилгаан станц барина гээд шийдэж байсан. 1987 онд таван жилийн төлөвлөгөө хэлэлцэж байх үед Багануурын цахилгаан станц барих шийдвэрийг Засгийн газар гаргаж байсан юм билээ. Засаг төрийн шилжилт болоод энэ асуудал хаягдсан. Тэр үед л төлөвлөгдөж байсан. Тэр төлөвлөлтийг Тавантолгойн цахилгаан станц зөрчсөн. Барих газраа хүртэл шийдчихсэн байхад Багануурын цахилгаан станц барина гээд л өөрчилсөн. Түүний дараа Багануурын цахилгаан станц бас болохгүй байна гээд хүчингүй болгосон. Одоо болохоор цахилгаан станцын тендер зарлагдаад ч явдаггүй. Эрчим хүчний эрсдэлт нөхцөл байдал үндэсний аюулгүй байдлын хэмжээнд хүрээд байна.

Үе, үеийн сайдууд энэ асуудалд анхаарсаар ирсэн. Нэн ялангуяа энэ дүр зургийг одоогийн сайд харж, шийдэл гарцыг харж байгаа учир улираан томилсон. Сайдаа дэмжиж нэг толгойтой ажиллах хэрэгтэй" гэжээ

Мөн өнөөдөр Засгийн газрын ээлжит бус хуралдаанаар Шинэ Засгийн газрын эхний хуралдаанаар төрийн үрэлгэн зардлыг багасгах, төр өөрөө бүсээ чангалах хэмнэлтийн тодотголыг үргэлжлүүлэн хэлэлцэх юм байна.