МАН-ын Удирдах зөвлөл өнөөдөр хуралдаж, Ерөнхий сайд Г.Занданшатарын Засгийн газрын бүтэц бүрэлдэхүүний саналыг дэмжжээ. Энэ талаар МАН-ын Ерөнхий нарийн бичгийн дарга Я.Содбаатар мэдээллээ.
Я.Содбаатар:
-”Ерөнхий сайд удирдах зөвлөлд танилцуулахдаа зарчмын зүйлүүд хэлсэн. Өнөөдөр дэлхий нийтэд болж байгаа нөхцөл байдал, үүнийг дагаад Монгол Улсад ирж байгаа хүндрэл бэрхшээл, манай экспортод гарч байгаа хүндрэлүүд болон улс орны эдийн засаг, нийгмийн амьдралыг нэг бүрчлэн ярилцсан. Энэ агуулгаар парламентад суудалтай намуудтай хамтарч ажиллах, Монголчууд нэгдсэн бодлоготой байж, хамтдаа асуудал шийдэх хэрэгтэй. МАН-ын Бага хурлын шийдвэрийн дагуу өмнө нь хамтарч ажиллаж байхдаа гэрээ зөрчсөн намаас бусад намуудтай хамтарч ажиллах талаарх чиглэлийг өгсөн. Ерөнхий сайд энэ удаагийн Засгийн газрыг байгуулахдаа Засгийн газрын бүтэц бүрэлдэхүүний тухай хуульд өөрчлөлт оруулахгүй, өнөөдрийнхөөрөө аваад явъя. Одоо орж ирэх төсвийн тодотголтой хамт бүтэц бүрэлдэхүүний өөрчлөлт хийгээд явна. Тийм учраас Үндэсний хороодыг ахалж байсан сайд нарыг томилохгүй явах шийдвэр гаргасан. Нэг ёсны энэ сайд нарын орон тоо хасагдана гэсэн үг.
Парламентэд суудалтай улс төрийн гурван намд хүсэлт хүргүүлсэн. Тухайн намууд шат шатны хурлаараа шийдвэрээ гаргаад Ерөнхий сайдад мэдэгдэх байх гэж бодож байна. УИХ-аар баталсан 2024-2028 оны Засгийн газрын үйл ажиллагааны хөтөлбөрт өөрчлөлт оруулахгүй. Засгийн газрын мөрийн хөтөлбөр, томоохон мега төслүүд явагдаж байгаа учраас асуудлаа мэдэж байгаа сайд нарыг үлдээхээ мэдэгдсэн. Бид хүн сольж сандал, ширээ зөөж, нэр ус солих шаардлага байхгүй. Иймээс Ерөнхий сайдын тавьсан саналыг МАН-ын Удирдах зөвлөл дэмжиж, процессын дагуу Ерөнхийлөгчтэй зөвлөлцөж, УИХ-ын чуулганд танилцуулна" гэв.
Мөн яамны статустай ажиллаж байсан Үндэсний хороодыг татан буулгахаар болсон байна. Үүнд,
- Монгол Улсын сайд, Хяналт үнэлгээний үндэсний хороо
- Монгол Улсын сайд, 20 минутын хот төслийн Үндэсний хороо
- Монгол Улсын сайд, Боомтын сэргэлтийн Үндэсний хороо багтаж байна.
Шинэ Засгийн газар өмнөхийн адил гурван Шадар сайдтай байх бөгөөд хамтарсан Засгийн газарт ажиллаж байсан сайд нарын 40 хувь нь дахин томилогдохоор болсныг эх сурвалж мэдээлсэн байна.
