Сэлбэ хотын төсөлтэй холбоотой тендер, худалдан авах ажиллагаанд дотоодын барилгын компаниудын оролцоог хязгаарласан эсэх асуудалд Монгол Улсын Хотын дарга Х.Нямбаатар тайлбар өглөө. Тэрбээр сэтгүүлчдийн асуултад хариулахдаа, “Монополын эсрэг газраас Сэлбэ хотын техник эдийн засгийн үндэслэл (ТЭЗҮ) болон худалдан авах ажиллагааг хууль, журмын хүрээнд нийцэлтэй хэмээн дүгнэсэн. Иймд өрсөлдөөн хязгаарласан асуудал байгаагүй нь тогтоогдсон” гэж мэдэгдлээ.

Мөн тэрбээр Сэлбэ хотын төслийг хэрэгжүүлэхэд өөрийн хувьд гүйцэтгэсэн үүргийн талаар тайлбарлахдаа, “Миний өмнөх удирдлагуудын үед Улаанбаатар хотод нэг ч томоохон төсөл байгаагүй. Харин би хотын даргаар томилогдсоноосоо хойш Сэлбэ хотын төслийн газрыг чөлөөлүүлж, холбогдох хууль, журамд өөрчлөлт оруулсан. ТЭЗҮ-г боловсруулж, Европын зах зээлд танилцуулан хөрөнгө босгосон. Барилгын салбарын төлөөллүүд шаардахад тендерийн ил тод байдлыг шалгуулахад бэлэн гэдгээ илэрхийлсэн. Үүний дагуу шалгалт хийгдэж, зөрчилгүй нь тогтоогдсон” хэмээв.

Сэлбэ хотын төслийн ТЭЗҮ-д холбогдох тооцоо, худалдан авах ажиллагааны бүх багц мэдээллийг багтаасан гэдгийг тэрбээр онцолж, “Европын зах зээлээс хөрөнгө татахын тулд олон улсын хөрөнгө оруулагчдад итгэл төрүүлэхүйц байдлаар нарийвчилсан тооцоо, төлөвлөгөөг ТЭЗҮ-д багтаан боловсруулсан” гэдгийг нэмэлтээр тодотгосон юм. Мөн “Хотын дарга бүхнийг дангаараа шийддэг мэт ойлголт буруу. Энэ бүхэн олон шатны хяналт, үнэлгээ, зөвшилцлийн үндсэн дээр хэрэгждэг” хэмээн онцоллоо.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.