Ингэж хэлээд явсан нөхөр эргэж хараад томилогдсон Ерөнхий сайдаа өдөр өнжихгүй ноцож байна. Нэг талаас энэ нөхөр танхимынхаа /өөрийнхөө/ зарим сайдыг үлдээх гэж зүтгээд /үүнээс болоод парламентын олонхи 2 хуваагдчихсан/, нөгөө талаас "Огцорсон сайд нарыг шинэ Засгийн газарт оруулахгүй" гэж эсэргүүцээд ёстой нэг "талыг там болтол" нүдэлдэж байх шиг, МАН-ынхан.

Эцэст нь хамтарсан ЗГ-т ажилласан МАН-ын бүх сайд нар "урвагч" нэр зүүв. Ерөнхий сайдад итгэл үзүүлэхгүй гэдэг кноп дарсныхаа төлөө. Гэхдээ Л.Оюун-Эрдэнээс урвалаа гээд улсаасаа урвасан болох уу? Эсрэгээрээ энэ хүнд хариуцлага тооцсон байж болох уу? Орлогоо нотолж чадаагүйн төлөө огцорч байгаа ЕС-ийн төлөө бусад нь яллуулах ёстой юу? Үгүй.

Гэхдээ нэг зарчмын асуудал байна. Хэрвээ танхимын гишүүд Л.Оюун-Эрдэнэдээ итгэхгүй л байсан юм бол "итгэл үзүүлэх" тухай тогтоолын төслийг УИХ-д оруулж ирэх хэрэггүй л байсан юм. Өөрөөр хэлбэл огцруулах процесс эхнээсээ "мордохын хазгай" болсон гэсэн үг. Түүнийхээ оронд 1998 онд АХЭ-ийн сайд нар "Ерөнхий сайд хууль зөрчсөн учир хамтарч ажиллахгүй" гээд өргөдлөө өгч байсантай адил үйлдэл хийсэн бол өөр хэрэг. Өргөдлөө өгсөн сайд нар дараачийн Засгийн газарт томилогдоод сонгууль дуустал ажилласан, гэхдээ л "урвагч" гэдэг нэртэй үлдсэн. Ж.Наранцацралтыг огцруулсан шалтгаан ч тэс өөр байсан.

Энэ удаа бол парламент "Итгэл үзүүлэх тухай" оруулж ирсэн тогтоолын төсөл чинь Үндсэн хуулийн 44-р зүйлд заасан шаардлагыг хангаагүй байна аа. Сэдэл шалтгаан ч гэсэн шал өөр байсан шүү гээд огчруулчих шиг боллоо. Товчхондоо парламент хууль зөрчөөгүй л гэсэн үг. Анхнаасаа хуульд нийцээгүй тогтоолын төслийг дэмжиж гар өргөсөн сайд нар нь хэд байсан, УИХ дээр орж ирээд хэд нь буцсан энэ тэрийг бол бид мэдэхгүй.

Юу хэлэх гэсэн бэ гэвэл, одоогийн хуулиар Ерөнхий сайд танхимаа дангаараа бүрдүүлэх эрхтэй, парламентаас ч, Ерөнхийлөгчөөс ч асуух ёсгүй. Танхимд хэн хэн багтахыг Г.Занданшатар өөрөө бие дааж шийдэх ёстой. Түүний тулд 2019 онд ҮНДСЭН ХУУЛЬД өөрчлөлт оруулсан.

За тэгээд нэгэнт "Хамтарсан Засгийн газрын үйл хэргийг үргэлжлүүлнэ" гээд амлачихсан хүн хуучин танхимаас хэнийг үлдээх, үлдээхгүйгээ ч гэсэн өөрөө мэдэх ёстой. Гол нь Л.Оюун-Эрдэнэ гэдэг хүний /одоогоор МАН дарга/дохио зангаанд л орж болохгүй. Нийгмийн зүгээс, намын бүлгээс, соошл ертөнцөөс ирж байгаа бүхий л шахалт дарамтыг даваад өөрийнхөө танхимыг бүрдүүлэх ёстой. Оюун-Эрдэнээс урвасан болохоос улсаасаа урваагүй гэж байгаа нөхөд байвал ороод л ажиллаг л дээ. Угаасаа Л.Оюун-Эрдэнэ гэдэг хүн МАН-ын идеал байхаа нэгэнт больчихлоо шүү дээ.

Эрх мэдлийг шилжүүлсэн шиг шилжүүлж сурмаар байна, хаана хаанаа. Өнгөрсөн борооны араас цув нөмөрч болохгүй.

Б.ЗАЯА