Гэр бүл, хөдөлмөр, нийгмийн хамгааллын яамны Төрийн нарийн бичгийн дарга Л.Мөнхзул Бүгд Найрамдах Узбекистан Улсын Хөдөлмөр эрхлэлт, ядуурлыг бууруулах яамны Дэд сайдыг хүлээн авч уулзлаа. Уулзалтын үеэр хоёр улсын хөдөлмөр эрхлэлт, хөдөлмөрийн аюулгүй байдал, хөдөлмөрийн хяналт, хөдөлмөр эрхлэлтийг дэмжих болон цаашдын хамтын ажиллагааны чиглэлээр санал солилцсон байна.

Монгол Улсад 2020–2024 оны хооронд Узбекистаны нийт 32 иргэн хөдөлмөр эрхэлж байсан бол 2025 оны тавдугаар сарын 31-ний байдлаар 9 иргэн хөдөлмөр эрхлэх зөвшөөрлийн дагуу ажиллаж байгаа нь тус улсын иргэд манай улсын хөдөлмөрийн зах зээлд оролцож байгааг харуулж байна.

Уулзалтын үеэр Монгол Улсын хөдөлмөрийн зах зээлийн ирээдүйн эрэлтийн талаар хийсэн судалгааны үр дүнг танилцуулжээ. Тодруулбал, “Алсын хараа-2050” бодлогын хүрээнд 2035 он хүртэл Монгол Улсад нийт 478.1 мянган нэмэлт ажиллах хүч шаардлагатай гэсэн тооцоолол гарсан байна. Энэ нь дунд хугацаанд хөдөлмөрийн нөөцөө гадаад эх сурвалжаас нөхөх бодит шаардлага байгааг илтгэж байна.

Хоёр улс хоёулаа далайд гарцгүй, хөгжиж буй орны нийтлэг нөхцөлтэй тул ижил сорилттой тулгарч, ижил төстэй бодлогын шийдэл эрэлхийлж буйг уулзалтын үеэр онцолжээ. Узбекистаны Засгийн газар ажилгүйдэл, ядуурлыг бууруулах тодорхой зорилтууд тавин хэрэгжүүлж байгаа нь хоёр улсын туршлага солилцох боломжийг улам нэмэгдүүлж байна.

Цаашид хөдөлмөр эрхлэлтийн чиглэлээр хамтран судалгаа, зөвлөх үйлчилгээ, хөдөлмөрийн ур чадварын үнэлгээ, ажлын байрыг нэмэгдүүлэх төсөл хөтөлбөр хэрэгжүүлэхэд хамтран ажиллахад бэлэн байгаагаа талууд илэрхийлсэн юм.

Эх сурвалж: ГБХЗХЯ