Монгол Улсын Их Хурлын Ёс зүй, дэгийн байнгын хороо, Европын аюулгүй байдал, хамтын ажиллагааны байгууллага (ЕАБХАБ), Парламентын судалгаа, хөгжлийн хүрээлэнгийн хамтарсан “Парламентын шударга байдал ба Ёс зүйн дүрэм” сэдэвт хэлэлцүүлэг өнөөдөр Төрийн ордны “Их Эзэн Чингис хаан” танхимд зохион байгуулагдлаа.

Хэлэлцүүлэгт УИХ-ын гишүүн, Ёс зүй, дэгийн байнгын хорооны дарга Б.Баярбаатар тэргүүтэй гишүүд, Тамгын газрын болон нам, эвслийн бүлгийн ажилтнууд, төрийн байгууллагын төлөөлөл, эрдэмтэн судлаачид оролцов. Чиглүүлэгчээр Парламентын судалгаа, хөгжлийн хүрээлэнгийн Судалгааны хэлтсийн дарга Г.Гэсэр ажилласан юм.

УИХ-ын Ёс зүй, дэгийн байнгын хорооны дарга Б.Баярбаатар хэлэлцүүлгийг нээж үг хэлэхдээ “Гурван төгөлдөршил” буюу хүн төвтэй, ойлгомжтой, цаг үеийн шаардлагад нийцсэн хуулийг эрх зүйн орчинд хэрэгжүүлэх тухай УИХ-ын даргын санаачилгын талаар дэлгэрэнгүй танилцууллаа. Энэ санаачилга хэрэгжсэнээр авлига, хүнд суртал, хүний эрхийн зөрчил багасаж, төрийн албанд ёс зүйг бэхжүүлнэ хэмээн онцлов. Түүнчлэн Төрийн албан хаагчийн ёс зүйн тухай хуулийн шинэчилсэн найруулгын төслийг боловсруулах ажлын хэсэг байгуулагдаад буйг дурдсан юм.

Хэлэлцүүлгийн хүрээнд ЕАБХАБ-ын Ардчилсан институц, хүний эрхийн албаны төлөөлөгчид илтгэл танилцуулсан. Тус байгууллагын Ардчилсан засаглал, жендерийн асуудал хариуцсан хэлтсийн дарга Юлия Нетесова илтгэлдээ ардчиллын үндэс болох шударга байдал, олон нийтээс ирэх итгэл, оролцоо, хяналтын ач холбогдлыг онцлон тэмдэглэсэн. Мөн ёс зүйн дүрэм нь зөвхөн баримт бичиг бус, засаглалын тогтолцоог бэхжүүлэх чухал хэрэгсэл гэдгийг дурдав.

Шударга байдлын хүрээнд олон улсын сайн туршлага, ашиг сонирхлын зөрчлийн талаарх хяналтын механизмууд, ёс суртахууны зарчим, төрийн албаны нийтлэг үнэт зүйлсийн тухай дэлгэрэнгүй судалгааг ЕАБХАБ-ын мэргэжилтэн Нина Чантурия танилцуулсан байна. Илтгэлд парламентын гишүүдийн ёс зүй, ашиг сонирхлын зөрчил, хөрөнгө орлогын мэдүүлэг, бие даасан хяналтын байгууллагуудын үүргийн талаар дэлхийн туршлагыг жишээ болгон танилцуулжээ.

Үргэлжлүүлэн УИХ-ын гишүүн Б.Баярбаатар “Парламентын ёс зүйн дүрэм, ашиг сонирхлын зөрчил, тогтолцооны талаар” илтгэл тавьж, Монголын парламентын ёс зүйн үнэлгээ, хөгжлийн чиг хандлагыг танилцуулсан. Тэрбээр парламентын үйл ажиллагааны тулгын гурван чулуу нь шударга байдал, ёс зүй, итгэлцэл хэмээн онцолж, ёс зүй нь ардчиллын үнэт зүйл, иргэдийн итгэлийг хамгаалах үндсэн хүчин зүйл болохыг дахин дахин дурдсан байна.

Хэлэлцүүлгийн төгсгөлд оролцогчид асуулт хариулт өрнүүлж, байр сууриа илэрхийлэн санал солилцсон бөгөөд ёс зүйн тогтолцоог олон улсын жишигт нийцүүлэн боловсронгуй болгоход хамтран ажиллахаар санал нэгдэв.