Ерөнхий сайд Г.Занданшатар томилогдсоноос хойш хэд хоног өнгөрч буй ч өнөөдрийг хүртэл Засгийн газрын бүтэц, бүрэлдэхүүний тухай хуулийн төслийг Улсын Их Хуралд өргөн бариагүй байна. Түүний удирдах шинэ Засгийн газар хэрхэн бүрдэж, ямар бүтэцтэй байх вэ гэдэг олон нийтийн анхаарлыг татаж, улс төрийн орчинд хүлээлт бий болгожээ.

Өчигдрөөс эхлэн Ерөнхий сайд УИХ-д суудалтай Хөдөлмөрийн үндэсний нам (ХҮН), Иргэний зориг ногоон нам (ИЗНН), Үндэсний эвсэл зэрэг намуудад хамтран Засгийн газар байгуулах албан ёсны санал хүргүүлсэн. Эдгээр намуудын удирдлагууд өнөөдөр хуралдаж, хамтарсан Засгийн газарт оролцох эсэхээ шийдвэрлэнэ.

Үүний зэрэгцээ МАН-ын Удирдах зөвлөл яг одоо хуралдаж байгаа бөгөөд тэд Засгийн газрын бүтэц, сайд нарын бүрэлдэхүүнтэй холбоотой асуудлыг хэлэлцэж буй. МАН-ын шийдвэр, бусад намуудын байр суурь тодорхой болсны дараа Ерөнхий сайд Г.Занданшатар хуулийн төслийг УИХ-д өргөн барина гэж мэдээлж байна.

Одоогоор ямар яам шинээр байгуулагдаж, ямар бүтцийн өөрчлөлт орж ирэх нь тодорхойгүй байгаа ч Ерөнхий сайдын хүргүүлсэн зөвшилцөх санал болон улс төрийн намуудын хариу шийдвэрээс шинэ Засгийн газрын өнгө төрх тодорхой болох хүлээлттэй байна.