Гадаадын иргэн, харьяатын газар 2025 оны эхний таван сарын байдлаар нийт 22,509 гадаадын иргэнд визийн зөвшөөрөл, 11,484 иргэнд виз олгосон тухай мэдээллээ. Мөн эрх бүхий байгууллагын зөвшөөрөлд үндэслэн 12,268 гадаадын иргэнд Монгол Улсад оршин суух зөвшөөрөл олгож, 14,430 иргэний оршин суух хугацааг сунган, 4,135 иргэнийг бүртгэлээс хассан байна.

Эдгээр тоон үзүүлэлтийг өмнөх оны мөн үетэй харьцуулахад:

• Виз олголт 2.8 дахин өссөн

• Оршин суух зөвшөөрөл олголт 76.3 хувиар нэмэгдсэн

• Сунгалт 15.4 хувиар нэмэгдсэн

• Бүртгэлээс хасалт 31.1 хувиар буурсан байна.

2025 оны тавдугаар сарын байдлаар Монгол Улсад 136 орны 40,003 гадаадын иргэн албан болон хувийн хэргээр оршин суух зөвшөөрөлтэй байгааг ГИХГ мэдээлэв. Үүнд:

• Албан хэргээр: 607 иргэн

• Хөрөнгө оруулагч: 4,404

• Хөдөлмөр эрхлэгч: 20,839

• Гэр бүлийн болон хувийн бусад зорилгоор: 8,466

• Суралцагч: 3,734

• Цагаач: 1,834

• Шашны зорилгоор: 119 иргэн тус тус оршин сууж байна.

Эдгээр өсөлт нь гадаадын хөрөнгө оруулалт, хөдөлмөр эрхлэлтийн цар хүрээ тэлж байгаагийн нэг илрэл бөгөөд Монгол Улс гадаад харилцаагаа идэвхжүүлж, олон улсад нээлттэй бодлого баримталж буйн тод жишээ юм.

Эх сурвалж: Гадаадын иргэн, харьяатын газар