Монгол Улсын Засгийн газрын хэрэгжүүлэгч агентлаг болох Төмөр замын газрын дарга Б.Артур тэргүүтэй төлөөлөгчид 2025 оны зургадугаар сарын 10-13-ны өдрүүдэд БНХАУ-ын Чиндао хотод зохион байгуулагдсан Төмөр Замуудын Хамтын Ажиллагааны Байгууллага (ТЗХАБ)-ын Сайд нарын 52 дугаар чуулганд амжилттай оролцлоо.
Энэ удаагийн чуулганд Азербайжан, Беларусь, Вьетнам, Хятад, Солонгос, Лаос, Монгол, Польш, Орос, Узбекстан зэрэг ТЗХАБ-ын гишүүн 21 орны зам тээврийн асуудал хариуцсан байгууллагын төлөөлөл, Транс-Евразийн тээврийн олон улсын зохицуулах зөвлөлийн удирдлага зэрэг 110 гаруй гадаад, дотоодын зочид төлөөлөгчид оролцсон юм.
Чуулганы үеэр:
-
ТЗХАБ-ын 2024 оны үйл ажиллагааны тайлан, төрөлжсөн хороодын ажлын дүнг танилцуулж, тэдгээрийн сайжруулалтын санал тусгасан протокол баталж, мөрдлөг болгохоор шийдвэрлэв.
-
2026 оны үйл ажиллагааны төлөвлөгөө, 2025 оны эцсийн болон 2026 оны урьдчилсан төсвийг хэлэлцэн батлав.
-
Хорооны удирдлагын бүтэц, ажил үүргийн хуваарийн шинэчилсэн саналууд хэлэлцэгдэв.
-
53 дугаар Сайд нарын чуулганы зохион байгуулах орон, хэлэлцэх асуудал, хугацаа зэрэгт урьдчилсан тохиролцоо хийв.
Монгол Улсын төлөөлөл болох Б.Артур хурлын албан ёсны протоколд гарын үсэг зурж, ТЗХАБ-ын гишүүн орнуудтай төмөр замын хамтын ажиллагааг өргөжүүлэх асуудлаар ажлын уулзалтууд хийв.
Мөн чуулганы үеэр БНХАУ-ын CRRC, CREC, CCCC, CRCC, CRSC зэрэг төмөр замын тээврийн тэргүүлэх компаниудын технологийн үзэсгэлэн дэлгэгдэж, оролцогчид 600 км/цаг хүртэл хурдлах маглев галт тэрэгний технологи, өндөр хурдны галт тэрэгний үйлдвэрлэлтэй газар дээр нь танилцав. “CRRC Чиндао Сифан” компанийн инженерийн дэвшил, бүтээн байгуулалтын үйл ажиллагаа нь хуралд оролцогчдын анхаарлыг ихээхэн татсан байна.
Энэхүү чуулганд Монгол Улс идэвхтэй оролцож, бүс нутгийн төмөр замын хамтын ажиллагааг бэхжүүлэх, технологийн дэвшлийг нутагшуулах, бодлогын уялдаа холбоог сайжруулах олон улсын төвшний санаачилга, бодлогын түвшний хэлэлцүүлэгт хувь нэмрээ оруулсан юм.
Эх сурвалж: Төмөр замын газар.
