Монгол Улсын 34 дэх Ерөнхий сайдаар томилогдоод байгаа Г.Занданшатар танхимаа бүрдүүлэхээр УИХ-д суудалтай зарим намд зөвшилцөх бичиг илгээжээ. Тодруулбал, тэрбээр УИХ-ын гишүүн, Иргэний зориг ногоон намын дарга Б.Батбаатарт Засгийн газрын бүрэлдэхүүнд хамтран ажиллах саналыг хүргүүлсэн байна. Тус бичигт "Шинээр томилогдсон Ерөнхий сайдын хувьд Монгол Улсын Үндсэн хуульд заасан төрийн үйл ажиллагааны үндсэн зарчмыг баримтлан, улсын эрх ашгийг эн тэргүүнд тавих, улс орны хөгжлийн өмнө тулгарсан томоохон сорилт, бэрхшээлийг харилцан ойлголцолд тулгуурлан зөвшилцлийн үндсэн дээр шийдвэрлэх нь зүйтэй гэж үзэж байна" гэжээ. Тус саналын бичгийг бүрэн эхээр нь хүргэе.

МОНГОЛ УЛСЫН ЗАСГИЙН ГАЗАР
Төрийн ордон, Жанжин Д.Сүхбаатарын талбай,
8 дугаар хороо, Сүхбаатар дүүрэг, Улаанбаатар хот, 14201
Утас: (976-51) 26 08 17, Факс: (976-51) 26 28 04
Цахим шуудан: info@cabinet.gov.mn
Цахим хуудас: www.mongolia.gov.mn

2025.06.16 № 35-1/73
ИРГЭНИЙ ЗОРИГ НОГООН НАМЫН ДАРГА Б.БАТБААТАР ТАНАА

Зөвшилцөх санал хүргүүлэх тухай

Монгол Улсын Их Хурлын 2024 оны ээлжит сонгуулийн үр дүнд Улсын Их Хуралд суудал авсан улс төрийн намуудын мөрийн хөтөлбөрийг харгалзан, үндэсний нэгдмэл эрх ашгийг удирдлага болгон, Засгийн газрын 2024-2028 оны үйл ажиллагааны хөтөлбөрийг Улсын Их Хурлын 2024 оны 21 дүгээр тогтоолоор баталсан.

Шинээр томилогдсон Ерөнхий сайдын хувьд Монгол Улсын Үндсэн хуульд заасан төрийн үйл ажиллагааны үндсэн зарчмыг баримтлан, улсын эрх ашгийг эн тэргүүнд тавих, улс орны хөгжлийн өмнө тулгарсан томоохон сорилт, бэрхшээлийг харилцан ойлголцолд тулгуурлан зөвшилцлийн үндсэн дээр шийдвэрлэх нь зүйтэй гэж үзэж байна.

Олон улсын харилцаа, геополитикийн эгзэгтэй нөхцөл байдал үргэлжилж, худалдааны тарифын зөрчилдөөн, уул уурхайн бүтээгдэхүүний зах зээлийн үнийн уналтаас үүдэлтэй эдийн засагт үзүүлэх сөрөг нөлөөллийг бууруулах, төрийн бодлогын тогтвортой байдал, залгамж чанарыг хадгалах, үндэсний эв нэгдлийг хангаж ажиллах нь энэ цаг үед туйлын чухал юм.

Иймд Монгол Улсын Үндсэн хуулийн Гучин есдүгээр зүйлийн 3, 4 дэх хэсэг, Монгол Улсын Засгийн газрын тухай хуулийн 23 дугаар зүйлийн 1 дэх хэсгийн 1, 2 дахь заалтад заасан бүрэн эрхийнхээ хүрээнд Засгийн газрын бүрэлдэхүүнд хамтран ажиллах саналыг зөвшилцөхөөр Танд хүргүүлж байна.

Саналыг судлан үзэж, хариу ирүүлнэ үү.

МОНГОЛ УЛСЫН ЕРӨНХИЙ САЙД
/гарын үсэг/ Г.ЗАНДАНШАТАР

/Тамга, бичиг баримтын дугаар: 00075400260/