УИХ-ын Эдийн засгийн байнгын хорооны гишүүд өнөөдөр Олон улсын валютын сан (ОУВС)-гийн Дүрмийн 4 дүгээр заалтын дагуу Монгол Улсад ажиллаж буй ажлын хэсгийн ахлагч Тахсин Саади тэргүүтэй төлөөлөгчдийг хүлээн авч уулзлаа.

ОУВС-гийн Дүрмийн 4 дүгээр заалтын дагуу тус сангаас жил бүр гишүүн орнуудад ажиллаж, эдийн засгийн ерөнхий нөхцөл байдал, төсвийн төлөв, бодлогын хэрэгжилт зэрэгт үнэлгээ өгч, зөвлөмж хүргүүлдэг уламжлалтай. Тахсин Саади уулзалтын үеэр Монгол Улсад хийх үнэлгээний ажлыг долоон сарын өмнөөс төлөвлөсөн ч тухайн хугацаанд эдийн засгийн орчин мэдэгдэхүйц өөрчлөгдсөн гэдгийг онцлон дурджээ.

Төлөөлөгчид Монгол Улсын Засгийн газар, Сангийн яамтай хамтран ажиллаж, ойрын хугацаанд тайлангийнхаа товч хувилбарыг танилцуулах бол, үндсэн тайланг ирэх намар бэлэн болгохоор төлөвлөж буйгаа мэдэгдсэн байна.

Уулзалтын хүрээнд талууд Монгол Улсын эдийн засгийн өнөөгийн нөхцөл байдал, төсвийн хэрэгжилт, гадаад өрийн түвшин, дунд болон урт хугацааны төлөв, хэрэгжүүлж буй болон хэрэгжүүлэх боломжтой бодлогын талаар хэлэлцэж, ОУВС-гийн зүгээс өгөх дүгнэлт, зөвлөмжийг урьдчилан харилцан ойлголцох зорилготой ярилцлага өрнүүлжээ.

Уулзалтад УИХ-ын гишүүн М.Бадамсүрэн, Р.Батболд, Н.Батсүмбэрэл, П.Батчимэг, Г.Лувсанжамц, Б.Мөнхсоёл, Л.Соронзонболд, А.Ундраа нар болон ОУВС-гийн Монгол дахь Суурин төлөөлөгч Тигран Погосяан, Монгол Улсыг хариуцсан гүйцэтгэх захирал Ким Сонву зэрэг албаны хүмүүс оролцсон байна.

Эх сурвалж: УИХ-ын Хэвлэл мэдээллийн алба