УИХ дахь Ардчилсан намын бүлэг өнөөдөр хуралдаж дууссаны дараа мэдээлэл хийж, шинэ Ерөнхий сайд Г.Занданшатарт гурван үндсэн чиглэл бүхий бодлогын шаардлага хүргүүлэх болсноо мэдэгдлээ. АН-ын бүлгийн дэд дарга Б.Жаргалангийн хэлснээр эдийн засаг, төрийн хүнд суртал, авлигын нөхцөл байдалд анхаарч, шинэ Засгийн газар бодлогоо цэгцтэй, шуурхай тодорхойлох ёстой гэж үзэж байна.

Тэрбээр “Оны эхний таван сарын байдлаар эдийн засаг, нийгмийн үзүүлэлтүүд таатай бус, иргэдийн бодит орлого буурч, эрчим хүчний асуудал хурцдаж, авлигын сүүдэр төрийн бүх шатанд нэвчсэн” хэмээн дүгнэсэн юм. АН-ын бүлэг Засгийн газрын шинэ бүтцийг УИХ-д өргөн барихаас өмнө шаардлага хүргүүлж, дараах гол санаачилгуудыг дэвшүүлжээ:

• Засгийн газрын бүтэц, бүрэлдэхүүнд хэмнэлтийн бодлого хэрэгжүүлэх:

  • Яам болон сайдын тоог 50 хувиар бууруулах

  • Төрийн захиргааны болон тусгай албан хаагчдын тоог 20 хувиар цомхотгох

  • Төрийн албаны мэргэшсэн, тогтвортой тогтолцоог бий болгох, ашиг сонирхлын зөрчлийг арилгах

• Төрийн өмчит компаниудын үр ашгийг нэмэгдүүлэх:

  • Төрийн өмчит ААН-үүдийг нээлттэй хувьцаат компани болгох

  • Орон тоог хоёр дахин бууруулж, бүтээмжийг дээшлүүлэх

• Эдийн засгийн чөлөөт уур амьсгалыг дэмжих:

  • Татварын дарамтыг 20 хувиар бууруулах

  • Төрийн хяналт шалгалт, хүнд суртлыг цэгцэлж, бизнес эрхлэгчдийг чөлөөлөх

  • Хувийн өмч, хөрөнгө оруулагчдын эрхийг хамгаалах

• Төсвийн бодлого, хөрөнгө оруулалтад өөрчлөлт хийх:

  • 2025 онд 20 мянган ажлын байр шинээр бий болгох

  • 2025 оны улсын төсвийг тодотгож, урсгал зардлыг 20 хувиар танах

  • Төсвийн хөрөнгө оруулалтыг үндэсний аж ахуйн нэгжүүдэд чиглүүлж, тендерийг зөвхөн тэдний дунд зарлах

  • Мега төслүүдийг эрэмбэлэх, үр ашиггүй төслүүдийг зогсоох

Эдгээр шаардлага нь төрийн зардлыг танаж, авлигын шалтгаан болсон эдийн засаг дахь төрийн хэт оролцоог хязгаарлаж, хувийн хэвшлийг дэмжихэд чиглэж байна хэмээн Ардчилсан намын бүлэг онцоллоо.

Эх сурвалж: УИХ дахь Ардчилсан намын бүлэг.