Монгол Улс дэлхийн хамтын нийгэмлэгтэй мөр зэрэгцэн “Тогтвортой хөгжил–2030” хөтөлбөрийн хүрээнд жендэрийн тэгш байдлыг хангаж, хэнийг ч орхигдуулахгүй хөгжлийн зарчимд тууштайгаар ажиллаж буйгаа дахин баталлаа. Үүний тод жишээ нь Татварын ерөнхий газар НҮБ-ын Хөгжлийн хөтөлбөртэй хамтран “Жендэр сийл” төслийг амжилттай хэрэгжүүлж, жендэрийн тэгш байдлын мөнгөн гэрчилгээний болзол хангаж, Дэлхийн шагнал гардуулах ёслол–2025-т нэр бүхий анхны байгууллагын нэг боллоо.
Тус ёслол энэ сарын 12-нд цахимаар зохион байгуулагдсан бөгөөд НҮБ-ын Хөгжлийн хөтөлбөрийн жендэрийн асуудал хариуцсан захирал Ракель Лагунас, Африкийн анхны эмэгтэй Ерөнхийлөгч байсан зөвлөх Эллан Жонсон Сирлиф, Ази, Номхон далайн бүсийн зөвлөхүүд оролцсон юм. Энэхүү гэрчилгээгээр Монгол Улсын Татварын ерөнхий газар нь:
-
Дэлхийн болон Ази–Номхон далайн бүсийн анхны татварын байгууллага
-
Монгол Улсын төрийн байгууллагуудаас хамгийн түрүүнд энэхүү олон улсын гэрчилгээ хүлээн авсан байгууллага болж түүхэн амжилт гаргав.
Татварын ерөнхий газрын дарга, доктор (Ph.D) Ч.Чимидсүрэн хэлэхдээ:
“‘Жендэр сийл’ төслийн үр дүнд албан хаагчдын жендэрийн талаарх мэдлэг, ойлголт нэмэгдэж, жендэрийн мэдрэмжтэй бодлогыг салбарын хэмжээнд нутагшуулах суурь тавигдлаа. Цаашид татварын шинэчлэл, инновац, дижитал шилжилтийн зэрэгцээ жендэрийн тэгш байдлыг үнэт зүйл болгоно” хэмээн онцолсон юм.
Татварын ерөнхий газар 2025–2028 оны стратеги төлөвлөгөөндөө татвар төлөгч төвтэй, тэгш хүртээмжтэй боловсролыг түгээх үндсэн зорилтоо илэрхийлээд, татварын боловсролыг хүн бүрийн хэрэгцээнд нийцсэн хэлбэрээр, жендэрийн мэдрэмжтэй арга зүйгээр хэрэгжүүлэх талаар төлөвлөжээ. Түүнчлэн дотоод дүрэм, журам, хүний нөөцийн бодлогод жендэрийн зарчим, үзэл баримтлалыг нэвтрүүлсэн нь бусад төрийн байгууллагуудад манлайлах, үлгэр жишээ болохуйц алхам болж байгааг тэмдэглэв.
Төрийн үйлчилгээг ил тод, хүртээмжтэй, шударга хүргэхэд удирдлагын манлайлал, албан хаагч бүрийн идэвхтэй оролцоо, хамтын хариуцлага маш чухал бөгөөд энэ шагнал нь зөвхөн олон улсын үнэлгээ бус, байгууллагын соёл, хандлагын өөрчлөлтийг батлах нотолгоо боллоо.
Эх сурвалж: НҮБ-ын Хөгжлийн хөтөлбөр, Татварын ерөнхий газар.
