Нийслэлийн удирдлагууд 2024 онд Улаанбаатар хотын гол гудамж, замуудын эвдэрч, элэгдсэн, стандартын шаардлага хангахгүй болсон явган хүний замуудыг бүрэн шинэчлэх ажлыг үе шаттайгаар эхлүүлээд байна. Энэхүү ажил нь хотын өнгө үзэмж, иргэдийн аюулгүй, тав тухтай зорчих орчныг сайжруулах зорилготой бөгөөд энэ онд нийт 15 байршилд 29 км буюу 186.8 мянган ам.метр талбайн явган замыг байгалийн боржин чулуун хавтангаар тохижуулж буйгаараа онцлогтой.

Гол ажил хийгдэж буй Энхтайваны өргөн чөлөө, Их тойруу, Бага тойруу, Их Монголын гудамж, Чингисийн өргөн чөлөө зэрэг нь нийслэлийн гол хөдөлгөөний төвлөрөлтэй бүсүүд юм. Байгалийн чулуугаар хийгдэж буй шинэ зам нь урьд өмнө ашиглагдаж байсан бетон хавтангаас олон талаар давуу. Өмнөх хавтангууд нь үйлдвэрлэлийн аргаар бага нягттай хийгдсэн, хөдөлгөөн болон цаг агаарын нөлөөнд амархан бутарч, элэгддэг, мөн бороо, цас орсон үед халтиргаа ихтэй байв.

Харин энэ жилээс ашиглаж буй байгалийн боржин чулуу нь:

• Өндөр нягттай, элэгдэлд тэсвэртэй

• Цаг уурын нөлөөнд тэсвэртэй, ус чийг шингээдэггүй

• Халтирч гулсдаггүй, гадаргуутай

• Насжилт урттай, хамгийн багадаа 30–100 жил хэрэглэгддэг

Нийслэлийн Засаг даргын нэгдүгээр орлогч Т.Даваадалай “Хотын гудамж замуудын явган зам тогтмол эвдэрч, иргэдийн бухимдлыг төрүүлдэг. Энэ асуудлыг үндсээр нь шийдэхийн тулд байгалийн чулуугаар хийх шийдэл рүү шилжсэн” хэмээн онцлон тайлбарлав.

Тэрбээр Баянзүрх дүүргийн 3 дугаар хороонд явган зам шинэчилж буй “Сант-Өндөр” ХХК-ийн гүйцэтгэлийн ажилтай газар дээр нь танилцаж, норм стандарт, ажлын зурагт илүү нарийн заавар, холбоос, суурийн давхаргыг сайжруулах шаардлагатайг анхаарууллаа. Инженерүүдийн тайлбарласнаар хэсэгчилж эвдэрсэн хэсгийг жижиг засвар хийх боломжгүй, харин бүрэн хуулж шинээр тавих шаардлагатай ажээ.

“Сант-Өндөр” ХХК-ийн инженер Т.Батдэлгэр мэдээлэхдээ: “Зүүн 4 замаас Баруун 4 зам хүртэл нийт 13 мянга орчим ам.метр талбайд тавдугаар сараас хойш замын ажлыг гүйцэтгэж байна. Өнөөдрийн байдлаар 1000 гаруй ам.метр талбайд чулуу тавьсан. Өдөрт 16–21 ажилтантай ажиллаж байгаа бөгөөд цахилгаан, холбооны ажлууд ч зэрэгцэж явагдаж байна. Том оврын машинуудыг оройн 22:00 цагаас хойш төв рүү нэвтрүүлдэг тул шөнийн цагаар хогоо ачуулж, ажлаа хийж байна. Иймд иргэдийн зүгээс ойлгож хүлээж авна гэдэгт итгэж байна” гэв.

Шинэ замуудыг зөвхөн гаднаас харагдах байдлаар биш, бүтцийн хувьд чанартай гүйцэтгэхийг хотын удирдлагууд чухалчилж байна. Инженерчлэлийн хувьд энэ нь зөвхөн материалын сонголт бус, хотын ирээдүйн хөдөлгөөний соёл, иргэдийн аюулгүй байдлыг хамтад нь авч үзсэн цогц бодлого юм.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.