Монгол Улс болон БНХАУ-ын хамтын ажиллагааны хүрээнд стратегийн өндөр ач холбогдолтой “Гашуунсухайт–Ганцмод” чиглэлийн хил дамнасан төмөр замын бүтээн байгуулалтын ажил зургаадугаар сарын 9-ний өдөр албан ёсоор эхэллээ. Энэ төсөл нь Монгол Улсын Засгийн газрын 2024–2028 оны үйл ажиллагааны хөтөлбөрт багтсан “Боомтын сэргэлт” хөтөлбөрийн хүрээнд хэрэгжиж буй томоохон бүтээн байгуулалтын нэг юм.

Төслийн барилгын ажлыг хэрэгжүүлэх гэрээнд “Тавантолгой төмөр зам” ХХК болон БНХАУ-ын “Төмөр замын барилгын гүүрийн инженерийн товчоо групп” албан ёсоор гарын үсэг зурсан бөгөөд үүний дагуу хил холболтын төмөр замын анхны гүүрийн тулгуур цооногийн өрөмдлөгийг амжилттай эхлүүлсэн байна.

Нийт 32.6 км урттай энэхүү төмөр зам нь 1520 мм (өргөн цариг) болон 1435 мм (нарийн цариг)-ийн хос замтай, жилд 40 сая тонн ачаа тээвэрлэх хүчин чадалтай, нэгдүгээр зэрэглэлийн дэд бүтэц бүхий тээврийн сүлжээ байх юм. Гол замын урт 19.5 км байх бөгөөд үүнээс гадна хил орчмын хяналтын цогцолбор, технологийн барилга байгууламж, 8–31 метрийн өндөртэй дан болон хос гүүрүүд, дэд бүтцийн иж бүрэн шийдлүүд багтаж байна. Төслийн гүйцэтгэлийг хоёр жилийн хугацаанд дуусгах төлөвтэй.

Энэхүү төмөр зам ашиглалтад орсноор Монгол Улсын нүүрсний экспортод шууд нөлөө үзүүлэх юм. Одоогийн байдлаар 83 сая тонн нүүрс экспортолж байгаа бол уг дэд бүтцийн ачаар жилд 165 сая тонн хүргэх боломжтой. Тодруулбал, зөвхөн Гашуунсухайт–Ганцмод чиглэлд 30 сая тонн нүүрс экспортлох боломж нээгдэж, үүнийг 1 тонн нүүрсийг 100 ам.доллараар тооцвол 3 тэрбум ам.долларын экспортын орлого олох тооцоололтой. Түүнчлэн төмөр замаас жилд 250–300 сая ам.долларын тээврийн орлого төвлөрөх ба энэ нь ДНБ-д 1000 ам.доллароор нэмэр болох эдийн засгийн чухал үзүүлэлт юм.

Энэхүү төмөр замын холболт нь зөвхөн нэг чиглэлийн ач холбогдлоор хязгаарлагдахгүй бөгөөд цаашлаад Шивээхүрэн, Ханги, Бичигт зэрэг бусад боомтуудыг төмөр замаар холбох үндсэн суурь болох төлөвтэй.

Нээлтийн ёслолд “Тавантолгой төмөр зам” ХХК-ийн Гүйцэтгэх захирлын үүрэг гүйцэтгэгч Б.Дүгэржав, БНХАУ-ын “Чайна Энержи”-ийн “Ганцмод рэйлвэй инвестмент” ХХК-ийн захирал Вань Шанжюнь, “Хятадын төмөр замын барилгын гүүрийн инженерийн товчоо групп” ХХК-ийн дэд нарийн бичгийн дарга Ли Гуочян тэргүүтэй төлөөлөгчид, инженер, техникийн багийнхан оролцсон байна.

Эх сурвалж: НЗДТГ