Өнөөдөр үдээс өмнө хуралдсан УИХ дахь АН-ын бүлгийн хурлаар Ерөнхий сайдад Г.Занданшатарыг томилуулах Ерөнхийлөгчийн саналыг хэлэлцэв. Хуралдааны эцэст Ерөнхий сайдад нэр дэвшигчийн асуудлаар АН бүлгийн шийдвэр гаргахгүй, гишүүд өөрсдийн үзэмжээр саналаа өгөх шийдвэрт хүрсэн байна.
Тэгвэл уг асуудлаар АН-ын дарга, Эдийн засаг, хөгжлийн сайдын үүрэг гүйцэтгэгч Л.Гантөмөр дараах байр суурийг илэрхийлжээ.
Л.Гантөмөр:
-Шинэ Ерөнхий сайд парламентын засаглалыг илүү төгөлдөржүүлэх ажлыг хийх ёстой.
Хоёрдугаарт шударга ёс тогтоох хэрэгтэй. Түүнчлэн дунд шатны давхардсан бүтцийг арилгаж, төрийн албыг илүү цомхон, чадварлаг болгоход онцгой алхмууд хийх шаардлагатай байна.
Гуравдугаарт хавтгайрсан халамжийг хэрхэн хумих талаар маш нарийн бодлого хэрэгтэй.
Дөрөвдүгээрт Засгийн газрын тодорхойлсон мөрийн хөтөлбөрийг хэрэгжүүлэх гэх мэт нүсэр ажлууд хүлээж байна. АН-ын хувьд эдгээр ажлуудыг шахаж, шаардах үүрэгтэй.
АН-аас томилогдсон хяналт, бүтээмжийн менежерүүдийг халбал Ерөнхий сайдын арьсыг өвчинө. Яагаад гэвэл эдгээр хүмүүс ТӨХК-иуд дээр гарч байгаа хулгайг хянах үүрэгтэй хүмүүс. Гэтэл эднийгээ авч хаячихаад дур зоргоороо иддэг, уудаг байдал руугаа шилжих гэж байгаа бол, өршөөхгүй.
Харин бид 2026 онд төрийн албыг есөн хувь, ТӨХК-иудын албыг 10 хувь бууруулах зорилго тавьсан. Энэ төлөвлөгөөг нэхнэ.
