Монгол Улс, БНХАУ-ын хоорондын хилийн хамтын ажиллагааг бэхжүүлэх зорилгоор байгуулагдсан Хилийн хамтарсан комиссын зургаа дахь удаагийн хуралдаан энэ сарын 10, 11-нд Улаанбаатар хотноо амжилттай зохион байгуулагдлаа. Хуралдааныг монголын талаас Гадаад харилцааны яамны Гэрээ, эрх зүйн газрын захирал Ж.Соёлмаа, хятадын талаас Гадаад хэргийн яамны Хил, далайн хэргийн газрын Элчин зөвлөх Сун Хунлянь нар ахалж оролцов.

Хоёр талын төлөөлөгчдийн бүрэлдэхүүнд хил хамгаалах болон гаалийн байгууллага, боомтын захиргаа, усны болон ойн асуудал хариуцсан агентлагууд, орон нутгийн төлөөлөл оролцсон бөгөөд Засгийн газар хоорондын гэрээгээр зохицуулагддаг олон асуудлаар гүнзгий санал солилцсон байна.

Хуралдаанаар дараах гол асуудлуудаар нэгдсэн тохиролцоонд хүрэв:

• Хил орчмын нутагт хууль сахиулах болон хяналтын хамтын ажиллагааг сайжруулах

• Монгол, Хятадын хилийг гурав дахь удаагаа хамтран шалгах бэлтгэл ажлыг хангах

• Хилийн бүсэд ой, бэлчээрийн түймэртэй тэмцэх хамтын ажиллагааг өргөжүүлэх

• Хэрлэн гол, Шарилжийн гол зэрэг хил дамнасан усны асуудлаар мэдээлэл солилцох, хамгаалах зохицуулалт хийх

• 5G, AGV зэрэг ухаалаг тээврийн дэд бүтцийн хил дамнасан байрлал, эрх зүйн зохицуулалтын талаар хэлэлцэх

• Бичигт-Зүүнхатавч болон Хавирга-Архашаат авто замын шинэ гарц, мөн Замын-Үүд–Эрээний эдийн засгийн хамтын ажиллагааны бүсийн хил дамнасан байгууламжийн шугамыг тогтоох асуудлыг тохирох

Мөн талууд Монгол, Хятадын хилийн хамтарсан комиссын долоо дахь хуралдааныг 2026 онд БНХАУ-д зохион байгуулахаар урьдчилсан тохиролцоонд хүрлээ.

Энэхүү хуралдаан нь Монгол, Хятадын Засгийн газар хоорондын “Хилийн дэглэмийн тухай гэрээ”-ний хэрэгжилтийг хангах чухал механизм бөгөөд хоёр орны хил орчмын аюулгүй байдал, зохистой хөгжил, дэвшлийг хангахад чухал үүрэг гүйцэтгэж байна.

Эх сурвалж: Гадаад харилцааны яам