Монгол Улсын Сонгуулийн ерөнхий хороо Ардчилал, сонгуульд дэмжлэг үзүүлэх олон улсын хүрээлэнтэй хамтран “Сонгууль ажиглах Азийн жишиг төв” байгуулах талаар санамж бичиг байгууллаа. Гарын үсэг зурах ёслол Швед улсын Стокхолм хотод, тус хүрээлэнгийн төв байранд энэ сарын 10-нд болж, Монголын талаас СЕХ-ны дарга П.Дэлгэрнаран, олон улсын талын зүгээс Ерөнхий нарийн бичгийн дарга Кэвин Касас-Замора нар оролцож, санамж бичигт гарын үсэг зурсан юм.

Ёслолын ажиллагаанд Монгол Улсаас Шведийн Хаант Улсад суугаа Элчин сайд Ц.Мөнх-Өлзий, мөн тус хүрээлэнгийн Ази, Номхон далайн бүсийн хөтөлбөрийн захирал Лина Рикила Таман болон албаны бусад төлөөлөгчид оролцсон байна.

Шинээр байгуулагдах “Сонгууль ажиглах Азийн жишиг төв” нь бүс нутгийн хэмжээнд ардчилсан, ил тод, шударга сонгуулийн зарчмуудыг хэрэгжүүлэх, сонгуулийн ажиглалтын арга зүйг боловсронгуй болгох, шилдэг туршлагыг судалгаа, шинжилгээнд үндэслэн нэвтрүүлэх зорилготой. Мөн энэхүү төв нь олон улсын ажиглагчдыг сургаж чадавхжуулах, сонгуулийн тайлан, дүгнэлт, зөвлөмжийн чанар, мэргэжлийн түвшинг ахиулахад чиглэсэн үйл ажиллагаа явуулах юм.

Монгол Улс ийнхүү сонгуулийн ил тод байдал, ардчиллын үнэт зүйлсийг баталгаажуулах, бүс нутгийн хамтын ажиллагаанд шинэ түвшний оролцогч болохоор зорьж буйг энэ санамж бичиг тод харуулж байна.

Эх сурвалж: Сонгуулийн ерөнхий хороо