Эрдэнэс Монгол нэгдлийн зүгээс “Тэрбум мод” үндэсний хөдөлгөөний хүрээнд томоохон зорилт тавин ажиллаж байна. Нэгдлийн хэмжээнд уул уурхайн үйл ажиллагаа эрхэлдэг найман компани нэгдсэн зохион байгуулалттайгаар Хархорумын ногоон бүсийн 778 га талбайд нийт 563 мянган мод тарих үүрэг хүлээжээ. Тус ажил нь зөвхөн амлалт бус, биелүүлэх төлөвлөгөөний хүрээнд энэ ондоо бүрэн гүйцэтгэгдэх зорилт тавигдсан байна.

Гол хүндрэл нь усны хангамжийн асуудал болж байгаа бөгөөд мод тарьсан ч усалгааг бүрэн шийдэхгүй бол үр дүнгүй болох, мод үхэх эрсдэл байгааг С.Наранцогт онцолсон. Тиймээс технологийн дагуу, мод үржүүлгийн төвтэй, усалгааны системийг бүрэн шийдсэн, арчилгаа хамгаалалт сайтай бүтцийг цогцоор нь шийдэх шаардлагатай байгааг анхааруулсан.

Эрдэнэс Монголын хэмжээнд “Тэрбум мод” хөтөлбөрийн хүрээнд нийт 390 сая мод тарих томоохон амлалт бий. Одоогоор зарим хэсэг нь амжилттай хэрэгжиж байгаа бол зарим хэсэгт алдаа оноо гарч байгаа тухай ч дурдсан. Тиймээс тус нэгдэл системтэй, үр дүнтэй менежмент хэрэгжүүлж, Эрдэнэт үйлдвэрийг түшиглэн шилмүүст төрлийн модны суулгац ургуулах “Ойн геобенефитийн төв” байгуулжээ. Энэ төв нь олон улсын шилдэг туршлагад суурилсан бөгөөд суулгацын чанар, нөхөн сэргээлтийн үр дүнг дээшлүүлэх чухал суурь болж байгаа юм.

Нэгдэл “тогтвортой ногоон хөгжил, тогтвортой уул уурхай” гэсэн стратегийн хүрээнд уул уурхайн нөлөөллийг байгаль орчинд аль болох бага байлгах, биологийн төрөл зүйлийн тэнцвэрийг хадгалах, нөхөн сэргээлтийг олон улсын стандартын дагуу хийх, мөн жил бүр ногоон хөгжлийн тайланг олон улсын шалгуурт нийцүүлэн гаргахаар төлөвлөж байна. Энэ бүх ажлыг нийгмийн хариуцлагын хүрээнд тусгайлан төсөвлөж, шат дараалалтайгаар хэрэгжүүлж буйгаа онцлон тэмдэглэв.