Улсын Их Хурлын Эдийн засгийн байнгын хорооны зургадугаар сарын 10-ны өдрийн хуралдаанаар Засгийн газраас 2025 оны тавдугаар сарын 16-нд өргөн мэдүүлсэн “Стандартчилал, техникийн зохицуулалт, тохирлын үнэлгээний итгэмжлэлийн тухай” хуулийн шинэчилсэн найруулгын төслийг хэлэлцлээ.

Хууль санаачлагчийн илтгэлийг Улсын Их Хурлын гишүүн, Засгийн газрын гишүүн, Монгол Улсын Шадар сайд С.Амарсайхан танилцуулсан юм. Тэрбээр 2017 онд баталсан хуулийн "стандартыг сонгон хэрэглэнэ" гэх заалт нь иргэн, аж ахуйн нэгж, төрийн хяналтын байгууллагуудын дунд ойлголтын зөрүү үүсгэж, энэ нь стандартын хэрэгжилтэд сөргөөр нөлөөлсөн гэж тайлбарлалаа. Үүний улмаас хүний амь нас, эрүүл мэнд, байгаль орчинд эрсдэл учруулах тохиолдол нэмэгдсэн байна.

Шадар сайдын танилцуулснаар Монгол Улсад одоогоор 6,733 стандарт хүчин төгөлдөр мөрдөгдөж байгаа ч стандартын хэрэгжилт, соёл, тогтолцоо сул хэвээр байгааг тэмдэглэв. 2022 онд хийсэн дүн шинжилгээгээр 2000 гаруй стандартад судалгаа хийж, тэдгээрийн 20 гаруй хувь нь шаардлага хангасан, харин үлдсэн 80 орчим хувийг шинэчлэх, олон улсын стандарттай нийцүүлэх шаардлагатай гэж үзсэн байна.

Эрүүл мэнд, хүнс, барилга, аялал жуулчлал зэрэг стратегийн салбаруудын хувьд олон улсын хандлагаас хоцрох, чанар аюулгүй байдлыг алдах эрсдэл бий болжээ. Тухайлбал, Монгол Улсад эрүүл мэндийн чиглэлээр үйл ажиллагаа явуулж буй 400 орчим лабораторийн ердөө 35 нь, хүнсний лабораториудын 35 хувь нь л итгэмжлэлтэй байгаа нь тохирлын үнэлгээ, итгэмжлэлийн тогтолцоонд гүнзгий доголдол үүссэнийг харуулж байна.

Эдгээр нөхцөл байдал нь хуулийн шинэчилсэн найруулгыг зайлшгүй боловсруулж, батлах шалтгаан болжээ. Хуулийн төсөл боловсруулахдаа нийт 60 гаруй хэлэлцүүлэг зохион байгуулж, давхардсан тоогоор 20 мянга орчим хүн оролцож, 17,250 санал цуглуулан тусгасан болохыг Шадар сайд илтгэлийн төгсгөлд онцолсон юм.

Эх сурвалж: Parliament.mn