УИХ-ын Төсвийн байнгын хорооны 2025 оны зургаадугаар сарын 10-ны өдрийн хуралдаанаар Санхүүгийн зохицуулах хорооны орон тооны бус гишүүнд нэр дэвшүүлэх асуудлыг үргэлжлүүлэн хэлэлцэв.

Байнгын хорооны дарга Ц.Даваасүрэн танилцуулахдаа тус албан тушаалд таван хүн нэр дэвшүүлсэн ч гурав нь шаардлага хангасан тул зөвхөн эдгээр нэр дэвшигчдийг хуралдаанд оруулсан болохыг онцолсон юм. Үүнд:

• Өвгөнхүүгийн Гэрэлт-Од: Эдийн засагч, банк санхүүгийн салбарт олон жил ажилласан туршлагатай, МУИС-ийн дэд профессор, “Нийслэл аудит” ХХК-ийн шинжээч, “Багануур” ХК-ийн ТУЗ-ийн хараат бус гишүүн.

• Нинжийн Дөл-Эрдэнэ: Эдийн засагч, хөрөнгийн зах зээл, лизинг, менежментийн чиглэлээр ажилласан, “Монголын хөрөнгийн бирж”-ийн Санхүү, захиргаа хариуцсан дарга, “Томьёо нэгдэл” ХХК-ийн үүсгэн байгуулагч.

• Лхагвасүрэнгийн Энхбаяр: Эрх зүйч, олон улсын харилцаа, үндэсний аюулгүй байдал, мөнгө угаах, терроризмын санхүүжилттэй тэмцэх чиглэлээр ажилласан, одоогоор НҮБ-ын Дүрвэгсдийн асуудал эрхэлсэн дээд комиссын Монгол дахь ахлах мэргэжилтэн.

Хуралдааны үеэр нэр дэвшигчдийг цагаан толгойн дарааллаар санал хураах дэг мөрдсөн бөгөөд олонхийн санал авсан тохиолдолд дараагийн санал хураалт явуулахгүй байхаар зохицуулжээ.

Үүний дагуу Ө.Гэрэлт-Одыг нэр дэвшүүлэхийг дэмжих санал хураалтад хуралдаанд оролцсон гишүүдийн 57.9 хувь буюу 11 гишүүн дэмжсэн тул түүнд нэр дэвшигчийн саналын олонх бүрдсэн гэж үзэн, дараагийн санал хураалт явуулсангүй.

Эх сурвалж: Улсын Их Хурлын Хэвлэл мэдээллийн газар