Монгол, Хятадын хилийн хамтарсан комиссын 6 дугаар хуралдааныг 2025 оны зургаадугаар сарын 10, 11-ний өдрүүдэд Улаанбаатар хотноо зохион байгууллаа. Энэхүү хуралдаан нь “Монгол, Хятадын хилийн дэглэмийн тухай” хоёр улсын Засгийн газар хоорондын гэрээний хэрэгжилтийг хангах хамтын ажиллагааны механизмыг бүрдүүлдэг чухал арга хэмжээ юм.
Хуралдаанд монголын талаас Гадаад харилцааны яамны Гэрээ, эрх зүйн газрын захирал Ж.Соёлмаа, хятадын талаас Гадаад хэргийн яамны Хил, далайн хэргийн газрын Элчин зөвлөх Сун Хунлянь нар төлөөлөгчдийг ахлан оролцлоо. Мөн хил хамгаалах болон гаалийн байгууллага, боомтын захиргаа, ус, ой, орон нутгийн төлөөллүүд багтаж, хоёр тал олон асуудлаар санал солилцов.
Хуралдаанаар дараах гол асуудлуудыг хэлэлцэн, нэгдсэн тохиролцоонд хүрэв:
-
Хил орчмын нутаг дэвсгэрт хууль сахиулах хамтын ажиллагааг бэхжүүлэх;
-
Монгол, Хятадын хилийг гурав дахь удаа хамтран шалгах бэлтгэл ажлыг хангах;
-
Хилийн бүс нутгийн ой, бэлчээрийн түймрээс урьдчилан сэргийлэх;
-
Хэрлэн гол, Шарилжийн гол зэрэг хилийн усыг зохистой ашиглах, хамгаалах;
-
Хил дамнасан шинэ төрлийн ухаалаг тээврийн байгууламж болох 5G, AGV зэрэг технологийг хамтран ашиглах;
-
Бичигт-Зүүнхатавч, Хавирга-Архашаат чиглэлийн боомтуудын шинэ гарц, Замын-Үүд–Эрээний эдийн засгийн хамтын ажиллагааны бүсийн хилийн шугам дайран гарах цэгийг тохирох.
Талууд дараагийн буюу хилийн хамтарсан комиссын 7 дугаар хуралдааныг 2026 онд БНХАУ-д зохион байгуулахаар харилцан тохиролцсон байна.
Эх сурвалж: Гадаад харилцааны яам
