Улсын Их Хурлын дэд дарга Х.Булгантуяа өнөөдөр Хорватын парламентын гишүүн, тус улсын парламент дахь Хорват–Монголын бүлгийн дарга Предраг Штромар тэргүүтэй төлөөлөгчдийг хүлээн авч уулзлаа.
Уулзалтын үеэр Х.Булгантуяа Монгол, Хорват хоёр улс нийтлэг үнэт зүйлстэй, ардчилал, хүний эрх, хууль дээдлэх зарчимд тулгуурлан хамтран ажиллаж ирснийг онцлон тэмдэглэв. Тэрбээр Хорватыг Европ дахь чухал түншийн нэг хэмээн үзэж, хамтын ажиллагааг бүхий л салбарт өргөжүүлэх нь Монголын гадаад бодлогын тэргүүлэх чиглэлийн нэг гэдгийг дурдлаа. Мөн Монгол Улсын парламентын 2024 оны сонгуулийн үр дүнд эмэгтэй гишүүдийн тоо 32-д хүрч, нийт бүрэлдэхүүний 25 хувийг эзэлж буйг онцолж, энэ нь бүс нутагтаа тэргүүлэх үзүүлэлт болж байгааг тэмдэглэв.
Харин Хорватын парламентын гишүүн Предраг Штромар Монголын ардчиллыг өндрөөр үнэлдгээ илэрхийлээд, хөдөө аж ахуй, аялал жуулчлал, цахим технологи зэрэг салбарт хамтран ажиллах сонирхлоо илэрхийлэв. Түүнчлэн оюутан, судлаач солилцох тэтгэлэгт хөтөлбөр хэрэгжүүлэх, соёл урлагийн төв байгуулах санал гаргасан байна. Мөн “Далайд гарцгүй хөгжиж буй орнуудын судалгааны төв”-ийг Хорватын “3 тэнгисийн санаачилга”-тай холбох замаар Зүүн Европ руу стратегийн гарц нээх боломжийг хэлэлцжээ.
Талууд парламентын бүлгүүдийн түвшинд туршлага солилцох, хамтарсан төсөл хэрэгжүүлэх, харилцаа, хамтын ажиллагааг улам идэвхжүүлэхийн төлөө хамтран ажиллахаар тохиролцов.
Эх сурвалж: Улсын Их Хурлын Хэвлэл мэдээллийн газар
