Сонгуулийн ерөнхий хорооноос хэрэгжүүлдэг “Хариуцлагатай сонгогч” хөтөлбөрийн хүрээнд иргэдийг мэдээллийн эх сурвалжийг нягтлан шалгах, хуурамч мэдээллийг таних мэдлэгтэй болгох зорилготой “Баримтаар баталгаажуулъя” хэмээх шинэ сургалтын сэдэв, агуулга нэмэгджээ. Уг шинэ сэдвийг 2025 оны зургадугаар сарын 6-нд нийслэлийн сургагч багш нарт зориулан анх удаа танилцуулсан байна.
Сургалтыг Сонгуулийн ерөнхий хорооны Мэдээлэл, судалгаа, сургалтын төвөөс удирдан явуулсан бөгөөд дараах үндсэн чиглэлүүдийг хамарлаа:
-
Сургалт зохион байгуулах, илтгэл танилцуулах арга зүй
-
Хуурамч мэдээллийн талаарх ойлголт, түүний төрөл, тархалт ба үр дагавар
-
Хуурамч мэдээлэл ба технологийн хамаарал, эрсдэл, түүний нөлөө
Эдгээр агуулгыг онолын болон практик дасгалуудтай хослуулан хүргэж, сургагч багш нарын ур чадварыг сайжруулахад чиглэжээ. Ирэх хичээлийн жилд дээрх шинэ сэдвийг багтаасан сургалт аймаг, нийслэлийн бүх сум, хороонд хүрэх төлөвлөгөөтэй байгаа аж.
Анх 2022 оноос эхлэн улс орон даяар хэрэгжиж эхэлсэн “Хариуцлагатай сонгогч” хөтөлбөр нь ардчилсан сонгуулийн үнэт зүйлсийг түгээн дэлгэрүүлэх, ялгаварлан гадуурхалтгүй, эрх тэгш оролцоог дэмжих, сонгогчдын ухамсрыг дээшлүүлэхэд чиглэсэн. Тухайлбал, анх удаа сонгуульд оролцох залуу сонгогчдод зориулсан тусгайлсан ойлголтыг олгох нь энэхүү хөтөлбөрийн гол зорилго юм.
2025 оны хувьд энэхүү сургалт дөрөвдүгээр сараас эхлэн 18 аймагт хэрэгжсэн бөгөөд намрын улиралд бусад аймаг, нийслэлд шинэчилсэн агуулгаар үргэлжлэхээр төлөвлөгдөөд байна.
Эх сурвалж: Сонгуулийн Ерөнхий хороо
